केपी शर्मा ओलीसँग सम्बन्धित दुर्गा प्रसाईंको अभिव्यक्तिले सामाजिक संजाल तातिएको छ । जसमा एकातिर छन्, एमालेका नेता-कार्यकर्ता । अर्कोतिर दुर्गा प्रसाईं, उनका कार्यकर्ता र अन्य सामाजिक संजाल प्रयोगकर्ता छन् । 

काठमाडौँ: मेडिकल व्यवसायी दुर्गा प्रसाईंले उत्तेजक अभिव्यक्ति दिनेक्रम जारी छ । यही क्रममा प्रसाईंले प्रमुख प्रतिपक्षी दल नेकपा (एमाले)का अध्यक्ष केपी शर्मा ओलीबारे विवादित अभिव्यक्ति सार्वजनिक गरेका छन् । ओलीसँग सम्बन्धित प्रसाईंको उक्त दाबीले सामाजिक संजालमा चर्चा-परिचर्चा बटुलिरहेको छ । 

एमाले महासचिव शंकर पोखरेलले फेसबुकमा स्ट्याटस लेख्दै केपी शर्मा ओलीविरुद्ध भ्राम फैलाउने काम भएको र यस्ताखाले षड्यन्त्रविरुद्ध गम्भीर हुन आह्वान गरेका छन् ।  महासचिव पोखरेलले लेखेका छन्- ‘पहिले माओवादीहरु जाउलाखेलको टेलिकमको नयाँ भवनको फोटो राखेर केपी ओलीको घर भन्दै जनतामा भ्रम छर्ने गर्दथे ।

अहिले राजावादीहरु कम्वोडियाको टेलिकममा केपी ओलीको लगानी भनेर भ्रम छर्ने खेतीमा लागेको देखिन्छ । वैचारिक र राजनीतिक रुपमा स्खलित भएकाहरुको हतियार नै भ्रम सिर्जना गर्नु हो । नेपालमा सुशासन र विकासका प्रश्नमा सबैभन्दा योग्य देखिएको व्यक्ति माथिको प्रहार राष्ट्र र जनताको भविष्य माथिको प्रहार हो । भ्रममा नपरौं, यस्ताखाले षड्यन्त्रविरुद्ध गम्भीर बनौं ।’

एमालेका महासचिव मात्र होइन, एमालेका नेता-कार्यकर्ताले सामाजिक संजालमा दुर्गा प्रसाईंको अभिव्यक्ति र सामाजिक संजालमा फैलाइएका अन्य रिपोर्टहरुको प्रतिवाद गरिरहेका छन् । अर्कोतर्फ दुर्गा प्रसाईंको अभिव्यक्तिलाई समर्थन गर्ने मानिसहरु पनि सामाजिक संजालमा देखा परेका छन्, उनीहरुले पूराना मिडिया रिपोर्टहरुलाई सामाजिक संजालमा फैलाइरहेका छन् । 

'सोसल-मिडिया वार'को कारक

केही दिनअघि दुर्गा प्रसाईं झापा पुगेका थिए । झापामा ‘निर्माणाधीन’ रहेको होटल देखाउन उनले क्यामेरा बोकेका थुप्रै मानिसहरुलाई आमन्त्रित गरेका थिए ।  क्यामेरा बोकेका मानिसहरुका अगाडि उभिएर प्रसाईंले भने- ‘केपी ओलीको कम्बोडियामा टेलिकममा लगानी छ, कम्तिमा पनि २७ सयदेखि ३ हजार करोड रुपैयाँ लगानी छ…यही कुरा बाहिर ल्यायो, अब ल्याइदिन्छ भनेर त यिनिहरुले मसी छर्केको…त्यही हैन !’ 

https://www.youtube.com/watch?v=J1hu-d5REh4  

दुर्गा प्रसाईंको अभिव्यक्तिसहित सामाजिक संजालमा फैलिएको भिडियो क्लिपमा दुईवटा सन्दर्भ जोडिएका छन् ।

पहिलो- ‘केपी ओलीको कम्बोडियामा टेलिकममा कम्तिमा पनि २७ सयदेखि ३ हजार करोड रुपैयाँ लगानी छ ।

दोस्रो- ‘यही कुरा बाहिर ल्यायो, अब ल्याइदिन्छ भनेर त यिनिहरुले मसी छर्केको ।’ 

एमाले-दुर्गा प्रसाईं सम्बन्ध

प्रस्तुत दुईवटै विषयको सन्दर्भबारे हामी यहाँ चर्चा गर्न गइरहेका छौँ । सबैभन्दा पहिले सुरु गरौँ, दुर्गा प्रसाईं र नेकपा एमालेको सम्बन्धबारे । फागुन, २०७४ मा नेकपा एमाले र माओवादी केन्द्र सम्मिलित बाम गठनबन्धनको गृहकार्य जारी थियो । यही बेला तत्कालीन माओवादी निकट मेडिकल व्यवसायी दुर्गा प्रसाईंले केपी शर्मा ओली र पुष्पकमल दाहाल ‘प्रचण्ड’लाई भक्तपुरस्थित आफ्नै घरको टेबलमा राखेर ‘मार्सी चामलको भात’ खुवाएको तस्बिर सार्वजनिक भयो ।   

प्रस्तुत तस्बिर सार्वजनिक भएपछि दुर्गा प्रसाईं नेपाली मिडियाको केन्द्रमा रहे । मिडिया र राजनीतिक वृत्तमा उनी ‘मार्सी’ उपनामले चिनिन थाले । एमाले र माओवादी पार्टी बाम गठबन्धनले २०७४ को निर्वाचनमा बहुमत प्राप्त गर्‍यो र केपी शर्मा ओली प्रधानमन्त्री भए । एमाले र माओवादी पार्टीबीच एकता भयो र नेपाल कम्युनिस्ट पार्टी गठन भयो । तर, पार्टी एकता धेरै लामो समय टिकेन । 

नेकपा एमाले र माओवादी केन्द्र पूरानै अवस्थामा फर्किएपछि दुर्गा प्रसाईंले माओवादी रोजेनन्, उनी एमालेतिर लागे । चितवनमा सम्पन्न एमालेको १०औँ महाधिवेशनमा कुनै पद नपाएका प्रसाईंलाई एमालको दोस्रो केन्द्रीय कमिटी बैठकले केन्द्रीय सदस्य मनोनित गरेको थियो ।  केही समयअघिसम्म नेकपा (एमाले)का केन्द्रीय सदस्य थिए, दुर्गा प्रसाईं । उनी एमालेका अध्यक्ष केपी शर्मा ओलीलाई ‘हजुरबुवा’ भनेर सम्बोधन गर्ने गर्थे । तर, उनले अचानक फागुन, २०७९ मा उनले ‘राष्ट्र, राष्ट्रियता, धर्म संस्कृति र नागरिक बचाउन’ भन्दै नयाँ अभियान सुरू गरे । 

झापाको काँकडभिट्टामा पूर्वराजा ज्ञानेन्द्र शाह र उनका छोरा पूर्वयुवराज पारस शाहलाई अथिति बनाएर उक्त अभियान सुरु गरिएको थियो । अहिले दुर्गा प्रसाईं ‘राष्ट्र राष्ट्रियता धर्म संस्कृति र नागरिक बँचाउ माहाअभियानको नेतृत्वकर्ता’ बनेका छन् । साथै उनी हिन्दूराष्ट्र र राजसंस्था फिर्ता ल्याउने मिशनमा जुटेका छन् ।  अभियान सुरु गरेपछि दुर्गा प्रसाईंले नेपालका निजी बैंकहरुलाई क्रमश: प्रहार गरिरहेका छन् । आफ्नो टाउँको अर्बौँ ऋण रहेको घोषणा गर्ने प्रसाईंले चैत २०७९ देखि ऋणको साँवा-ब्याज तिर्न छाडेको समाचार केही समयअघि सार्वजनिक भएको थियो ।  

यही सन्दर्भमा दुर्गा प्रसाईंले आफ्नो पूर्व पार्टी नेकपा (एमाले) र नेताहरुविरुद्ध अभिव्यक्ति दिन थालेका थिए । यही कारण राष्ट्रिय युवा संघ नेपालका कार्यकर्ताले प्रसाईंलाई कालोमोसो दलेका थिए ।  २२ असोज (२०८०)मा काठमाडौंको जमलस्थित एल्लो प्यागोडा होटलमा प्रसाईंले पत्रकार सम्मेलन आयोजना गरेका थिए,  सोही पत्रकार सम्मेलनमा उनीमाथि कालो पोतिएको थियो । 

https://www.youtube.com/watch?v=i5zqIMywBbw

कालो पोतिएको घटनापछि एमाले र दुर्गा प्रसाईंबीच मुडभेडको अवस्था सृजना भएको छ । राष्ट्रिय युवा संघका कार्यक्रमहरु दुर्गा प्रसाईंका कार्यकर्ताले बिथोल्ने र दुर्गा प्रसाईंलाई एमालेका कार्यकर्ताले निषेध गर्ने जस्ता गतिविधिहरु भइरहेका थिए ।

दुर्गा प्रसाईंको बोलीसँगै फैलिएको ‘पूरानो रिपोर्ट’

प्रस्तुत घटनाक्रमको सन्दर्भमा दुर्गा प्रसाईंले केपी शर्मा ओलीको लगानी कम्बोडियाको टेलिकममा रहेको आरोप लगाए । दशैँको मुखमा प्रसाईंले दिएको उक्त अभिव्यक्ति सामाजिक संजालमा भाइरल भइरहेको छ । यतिमात्र होइन, दुर्गा प्रसाईंको अभिव्यक्ति पुष्टि भएको भन्दै उनका समर्थकले केही भिडियो रिपोर्ट पनि सामाजिक संजालमा फैलाइरहेका छन् ।

 जसमध्ये सबैभन्दा बढी फैलिएको एउटा रिपोर्टमा ‘oli In a corruption Scandal’ शिर्षक राखिएको छ । उक्त रिपोर्टको मूल सन्दर्भको जाँच गर्न हामीले युट्युबमा सोहि शिर्षकलाई सर्च गर्‍यौँ । सर्चको नतिजास्वरुप WION नामक युट्युब च्यानलमा पोस्ट गरिएको पूरानो रिपोर्ट फेला पर्‍यो । तीन वर्षअघि अर्थात् १५ जुलाई २०२० मा पोस्ट गरिएको भिडियो केपी शर्मा ओली प्रधानमन्त्री हुँदा बखतको हो । 

https://www.youtube.com/watch?v=ok_JqeGcleE

  भारतीय टेलिभिजन च्यानल जी न्यूजको भगिनी संस्था डब्लूआईओएनले ग्लोबल वाच रिपोर्ट नामक संस्थालाई स्रोत बनाउँदै कम्बोडियाको टेलिकम कम्पनीमा तत्कालीन प्रधानमन्त्री केपी शर्मा ओलीको लगानी रहेको दाबी गरेको थियो । त्यो बेला ‘जी न्यूज’ र ‘डब्लूआईओएन’ले नेपालका तत्कालीन प्रधानमन्त्री केपी शर्मा ओलीलाई सम्पूर्णरूपमा चीनले चलाइरहेको अपुष्ट आरोप लगाइरहेको थियो ।

दुर्गा प्रसाईंको आरोपपछि उनका समर्थक र सामाजिक संजाल प्रयोगकर्ताले उक्त पूरानो रिपोर्टको अंशलाई पुन: सामाजिक संजालमा पोस्ट गर्न थालेका छन् । तर, उक्त रिपोर्टमा आरोप पुष्टि गर्ने कुनै आधार प्रस्तुत गरिएको छैन ।