अमेरिकी राष्ट्रपति डोनाल्ड ट्रम्पले बालेन शाहको प्रशंसा गरेको भन्दै एउटा दृश्य सामाजिक संजालमा फैलाइएको छ । तर, दाबीसहितको सामग्रीलाई रुजू गर्दा आर्टिफिसियल इन्टेलिजेन्स (एआई) जनरेटेड ‘डिपफेक’ भाइरल भएको देखियो ।
दाबी समीक्षा
थुप्रै फेसबुक अकाउन्टहरु (Ganesh Regmi । Kopila Bhattarai । सोशल मिडिया नेटवर्क । ENT Nepal) मा अमेरिकी राष्ट्रपति डोनाल्ड ट्रम्प देखिने भिडियो पोस्ट गरिएको छ । उक्त भिडियोमा ट्रम्पले काठमाडौँ महानगरपालिकाका मेयर बालेन शाहको प्रशंसा गरेको देखिन्छ ।
प्रस्तुत भिडियो र पोस्टहरुमा राष्ट्रपति ट्रम्प बालेनसँग झुकेको र यसमा बालेन चनाखो बन्नुपर्ने टिप्पणीसमेत व्यक्त गरिएको छ ।
केही घण्टाअघि मात्रै (२०२५ फेब्रुअरी २२) पोस्ट हुन थालेको भिडियो विभिन्न सामाजिक संजालहरुमा फैलिरहेका छन् । यो भिडियो अगामि दिनमा झनै व्यापक रुपमा फैलिने देखिन्छ । त्यसैले भिडियोको वास्तविकता पत्ता लगाउन हामीले तथ्यजाँच गरेका छौँ ।
तथ्यजाँच: ‘डिपफेक’ भिडियो भाइल
काठमाडौँ महानगरका मेयर बालेन शाहले २०२५ फेब्रुअरी २० मा अमेरिकी राष्ट्रपति डोनाल्ड ट्रम्पलाई सम्बोधन गर्दै सामाजिक सञ्जालमा कडा टिप्पणी गरेका थिए । फेसबुकमा ट्रम्पलाई मेन्सन गर्दै बालेनले अमेरिका बाहिरी श्रमिकहरूमा निर्भर र अल्छी रहेको आरोप लगाएका थिए । साथै उनले उनले डीभी लट्रीलाई ‘लालचपूर्ण दासत्व’ को संज्ञा दिएका थिए ।
यही सन्दर्भमा अमेरिकी राष्ट्रपति ट्रम्पले बालेन शाहको प्रशंसा गरेको भन्दै एउटा दृश्य सामाजिक संजालमा फैलाइएको छ । प्रस्तुत भिडियोलाई हाम्रो तथ्यजाँचकीले गहन जाँच गरे । जाँचका क्रममा ट्रम्पको भिडियो वाक्तविक नभएको प्रमाणित हुने केही आधारहरु फेला परे ।
साथै भिडियोमा Try Parrot AI को लोगोसमेत देख्न सकिन्छ । TryParrotAI.com एक एआई आधारित प्लेटफर्म हो, जसले प्रसिद्ध व्यक्तित्वहरूको आवाज प्रयोग गरेर भिडियोहरू उत्पादन गर्दछ ।
Try Parrot AI बाट विभिन्न चर्चित व्यक्तिहरूको आवाज छनोट गरेर उनीहरूको स्वरमा संवाद सिर्जना गर्न सकिन्छ । साथै यसबाट टाइप गरिएको सन्देशलाई चर्चित व्यक्तिको आवाज छानेर भिडियो बनाउन सकिन्छ । उक्त भिडियो डाउनलोड पनि गर्न सकिन्छ ।
TryParrotAI.com तयार पारिएको ‘डिपफेक’ भिडियो सामाजिक संजालमा भाइरल भएको देखियो । अर्कोतर्फ अमेरिकी राष्ट्रपति डोनाल्ड ट्रम्पले बालेन शाहलाई जवाफ पनि दिएका छैनन् र प्रशंसा पनि गरेका छैनन् ।
निष्कर्ष
अमेरिकी राष्ट्रपति डोनाल्ड ट्रम्पले बालेन शाहको प्रशंसा गरेको भन्दै पोस्ट गरिएको दृश्य भ्रामक छ । आर्टिफिसियल इन्टेलिजेन्स (एआई) जनरेटेड ‘डिपफेक’ भिडियोलाई सामाजिक संजालमा भाइरल भएको देखियो ।
