दाबी: 'माननीय ज्ञानेन्द्र शाहीमाथि गृहजिल्ला जुम्लामा ढुङ्गा आक्रमण' ।
दाबीमा जोडिएका सामग्री: ज्ञानेन्द्र शाहीको तस्बिर र ‘समात त्यसलाई’ भनिएको आवाजसहितको अडियो ।
दाबी भेटिएको माध्यम/दाबीकर्ता: टिकटक, Khatri kamal नामक प्रयोगकर्ता
तथ्यः अप्रिल २०२२ मा घटेको ज्ञानेन्द्र शाहीसँग सम्बन्धित फरक घटनाको तस्बिर र आजावलाई दुई वर्षपछि भ्रामक दाबीसहित सामाजिक संजालमा पोस्ट गरिएको छ ।
नतिजा: भ्रामक 
सन्दर्भ जाँच: २०७९ वैशाखमा ज्ञानेन्द्र शाही सांसद निर्वाचित भएका थिएनन् । उनी चुनावको तयारका लागि गृह जिल्लामै थिए । यही समय जुम्लामा आयोजित एक कार्यक्रममा भाषण गरिरहेको बेला ज्ञानेन्द्र शाहीको छातीमा मोबाइल लागेको दृश्यसहितको भिडियो युट्युबमा भेटिएको छ ।
२१ अप्रिल २०२२ मा पोस्ट गरिएको भिडियोमा छातीमा मोबाइल लागेपछि ज्ञानेन्द्र शाहीले ‘समात् त्यसलाई’ भन्छन्, उनी निकटका मानिसहरू भीडतर्फ दौडिन्छन् । त्यतिकैमा माहौल तनावग्रस्त भएको दृश्य देखिन्छ । सोही घटनाको तस्बिर र अडियोलाई अहिले सामाजिक संजालमा पोस्ट गरिएको छ ।
तथ्यजाँच: ‘माननीय ज्ञानेन्द्र शाहीमाथि गृहजिल्ला जुम्लामा ढुङ्गा आक्रमण’ भएको भन्दै पोस्ट गरिएको अडियो र तस्बिर २०२२ अप्रिलमा घटेको घटनासँग सम्बन्धित छ । तर, २०२२ अप्रिलमा ज्ञानेन्द्र शाही ‘माननीय’ नै बनेका थिएनन् ।
आफ्नो छातीमा मोबाइल लागेको घटना सार्वजनिक भएपछि ज्ञानेन्द्र शाहीले रातोपाटी डटकमसँग भनेका थिए- ‘हाम्रो स्टेज तल थियो । घरका मान्छेहरू माथिबाट बार्दलीबाट हेरिरहेका थिए । मोबाइल खसेर लागिसकेपछि वरिपरिका मासले के सोच्यो भने मलाई मोबाइलले हिर्कायो । मैले मोबाइल खसेको हो, हिर्काएको होइन भनेर त्यतिबेला भीडलाई नै भनेको थिएँ ।’
