रवि लामिछाने छुट्ने भएपछि सिंहदरबारभित्र समितिको बैठकमा कुटाकुट भएको भन्दै यो भिडियो सामाजिक संजालमा पोस्ट गरिएको छ । तर, भिडियोलाई रुजू गर्दा, संसदीय समितिमा भएको फरक सन्दर्भको चर्काचर्कीलाई भ्रामक तरिकाले रवि लामिछानेसँग जोडिएको देखियो ।

दाबी समीक्षा

कान्छाको नयाँ नयाँ न्युज नामक टिकटक आइडीमा पोस्ट गरिएको भिडियोमा संसदीय समितिको एउटा दृश्य जोडिएको छ । उक्त भिडियोमा दुई सांसद राजकिशोर यादव र प्रेम सुवालबीच भनाभन भइरहेको देखिन्छ ।

२०२५ जनवरी ९ मा पोस्ट गरिएको भिडियोको थमनेलमा लेखिएको छ- ‘रवि छुट्ने भएपछि सिंहदरबारभित्र समितिको बैठकमा कुटाकुट । र प्रेम सुवाल र राजकिशोर यादवबीच कुटाकुट ।’ 

दाबीसहितको भिडियोमा साढे २६ हजारभन्दा बढी टिकटक प्रयोगकर्ताले रियाक्ट गरिसकेका छन् । १ हजारभन्दा बढी सेयर भएको भिडियोलाई लाखौँले हेरिसकेका छन् ।

के संसदीय समितिको बैठकमा दुबै सांसद प्रेम सुवाल र राजकिशोर यादवबीच कुटाकुट भएको हो त? रवि लामिछानेको नामसमेत जोडिएको दाबीलाई हामीले तथ्यजाँच गरेका छौँ ।

तथ्यजाँच: प्रेम सुवाल र राजकिशोर यादवबीच कुटाकुट भएको होइन

राजकिशोर यादव जसपा नेपालका सांसद हुन् भने सुवाल नेपाल मजदुर किसान पार्टी (नेमकिपा)का सांसद हुन् । यादव प्रतिनिधिसभाको अन्तर्राष्ट्रिय सम्बन्ध र पर्यटन समितिका सभापति हुन् भने सुवाल सोही समितिका सदस्य हुन् । 

कुटाकुट भएको दाबीसँगै पोस्ट गरिएको भिडियोमा दुबै सांसद देखिएक छन् । उनीहरुबीच चर्काचर्की भइरहेको छ । यही आधारमा हामीले ‘समिति बैठक’ ‘चर्काचर्की’ लगायतका वाक्यांशको जाँच गर्‍यौँ ।

जाँचको नतिजास्वरुप Kantipur TV HD युट्युब च्यानलमा पोस्ट गरिएको भिडियो फेला पर्‍यो । ९ जनवरी २०२५ मा पोस्ट गरिएको भिडियोको शिर्षक छ- ‘जसपा नेपालका सांसद राजकिशोर यादव र नेमकिपाका सांसद प्रेम सुवालबीच चर्काचर्की’ ।  फेला परेको भिडियोमा सांसदहरुबीच ‘कुटाकुट  भएको दृश्य’ देखिँदैन ।

अर्कोतर्फ यस सन्दर्भबारे विभिन्न संचार माध्यममा समाचार प्रकाशित भएका छन् । onlinekhabar.com र annapurnapost.com लगायतमा प्रकाशित समाचार अनुसार २०८१ पुष २५ गते संसदीय समितिमा नेपाल वायु सेवा निगमको विमान सञ्चालन व्यवस्थापन तथा सेवा सञ्चालनका सम्बन्धमा छलफल थियो । 

छलफलमा कार्यसूची बाहिरको विषय राखेको र लामो समय लिएको भनेर सुवाललाई सभापति यादवले रोक्न खोजेका थिए । त्यसपछि यादव र सुवालबीच चर्काचर्की परेको थियो । यही चर्काचर्की भइरहेको सन्दर्भमा खिचिएको एउटा दृश्यलाई दाबीसहितको सामग्रीमा जोडिएको पाइयो । तर, दुबै सांसदहरुबीच  ‘कुटाकुट’ भएको भने थिएन । 

अर्कोतर्फ दुबै सांसदहरुबीच भएको चर्काचर्की रवि लामिछानेसँग सम्बन्धित छैन ।  नेपाल वायु सेवा निगमको विमान सञ्चालन व्यवस्थापन तथा सेवा सञ्चालनका सम्बन्धमा छलफल भइरहेका बेला दुबै नेताबीच जवालजवाफ भएको हो । यही तथ्यलाई तोडमोड गरिएको देखियो ।

निष्कर्ष

सांसदहरुबीच समितिको बैठकमा ‘कुटाकुट’ भएको दाबीसहित पोस्ट गरिएको सामग्री भ्रामक छ । सांसदहरुबीच चर्काचर्की भएको जानकारी सत्य हो । तर, रवि लामिछाने छुट्ने भएपछि सिंहदरबारभित्र समितिको बैठकमा कुटपिट भएको होइन ।