दाबी: ‘आज साँच्चिकै लुक्लामा ठूलो जहाज । आएको हो र भन्दिन पर्‍यो ।’  

दाबीमा जोडिएका सामग्री:  एयरपोर्टमा ठूलो एयरबस जहाज उडान भर्दै गरेको भिडियो ।  

दाबी भेटिएको माध्यम/दाबीकर्ता: टिकटक, Kishor Kc प्रयोगकर्ता ।

तथ्य: लुक्ला विमानस्थलमा ठूलो एयरबस जहाजले उडान भर्दै गरेको दृश्य वास्तविक होइन । कम्युटर प्रविधिबाट तयार पारिएको दृश्यलाई सामाजिक संजालमा पोस्ट गरिएको छ ।

नतिजा: भ्रामक 

सन्दर्भ जाँच: लुक्ला एयरपोर्ट परिचित तेन्जिङ-हिलारी विमानस्थल नेपालको आन्तरिक विमानस्थल हो । सोलुखुम्बु जिल्लास्थित लुक्ला बजारमा रहेको उक्त विमानस्थल यो समुद्र सतहबाट २८ सय मिटरको उचाइमा छ ।

सन् २०१० मा प्रसारित द हिस्ट्री च्यानलको ‘मोस्ट एक्स्ट्रिम एयरपोर्ट्स’ डकुमेन्ट्रीले लुक्ला एयरपोर्टलाई विश्वको खतरनाक मध्येको एक एयरपोर्टका रुपमा चिनाएको थियो । भौगोलिक बनावट, धावनमार्ग अवस्था र मौसमका कारण यो विमानस्थलमा एयरबस जस्ता ठूला जहाजहरुले अवतरण र उडान भर्न सक्दैनन् । वर्तमान समयका लागि एयरबस जस्ता ठूला विमान यहाँ अवतरण गराउनु असम्भव जस्तै छ । 

तथ्यजाँच: सामाजिक संजालमा पोस्ट गरिएको भिडियोमा ठूलो एयरबस जहाजले लुक्ला विमानस्थलबाट उडान भरिरहेको दृश्य देख्न सकिन्छ । तर, यो वास्तविक दृश्य होइन ।

oYik Network नामक युट्युब च्यानलमा पोस्ट गरिएको बनावटी भिडियोलाई सामाजिक संजालमा पोस्ट गरिएको छ । उक्त च्यानलमा विभिन्न किसिमका जहाजहरू विश्वकै खतरनाक विमानस्थलमा उडाइएको काल्पनिक दृश्यहरु (कम्युटर प्रविधिबाट निर्माण गरिएका) पोस्ट गर्ने गरिन्छ । यही क्रममा १० फेब्रुअरी २०२४ मा लुक्ला एयरपोर्टमा एयरबस जहाज उडाएको काल्पनिक दृश्य पोस्ट गरिएको हो । यो भिडियोमा कुनै वास्तविकता छैन ।