दाबी: ‘अहिलेको तात्‌तालाे खबर ! ल हेर्नुस्, हाम्रो देशको पहिलो पत्रिकाको हालत यस्तो छ । कसैको चरित्र हत्या गर्छ अनि ल यो होइन भनेर माफी माग्छ । माफी मागेछ है कान्तिपुरले पनि, ल हेर्नुस् ।’

दाबीमा जोडिएका सामग्री: इकान्तिपुरको  लोगो (सामाजिक संजालमा स्क्रिनसट जस्तो देखिने) । लोगोसँगै लेखिएको छ- ‘सहकारी कोषबाट रबि लामिछानेले करोडौँ पैसा नलिएको र उनी निर्दोष देखिएका छन्, अहिलेसम्म गरेका हरेक पोस्टहरुमा हामी क्षमा माग्न चहान्छौँ, धन्यवाद् ’ । साथै एकजना पुरुषको दाबीसहितको आवाज सुन्न सकिन्छ ।

दाबी भेटिएको माध्यम/दाबीकर्ता: टिकटक । tiktok.com/@moneychor7 प्रयोगकर्ता ।

तथ्य: कान्तिपुर मिडियाले सामाजिक संजालबाट रबि लामिछानेले सहकारी कोषबाट करोडौँ रुपैयाँ नलिएको र उनी निर्दोष देखिएको भन्ने घारणा सार्वजनिक गरेको छैन । साथै आफ्ना पोस्टहरुप्रति क्षमा मागेको पनि मागेको छैन ।

नतिजा: भ्रामक 

सन्दर्भ जाँच: कान्तिपुर मिडिया ग्रुपद्वारा संचालित कान्तिपुर दैनिक लगायतका संचार माध्यमले सहकारीको रकम अपचलनमा गृह तथा उपप्रधानमन्त्री रबि लामिछानेको संलग्नता रहेको भन्दै समाचार र विचार प्रकाशन/प्रशारण गर्दै आएको छ ।

कान्तिपुरका समाचारहरु गोर्खा मिडिया नेटवर्कका तत्कालीन प्रबन्ध निर्देशक रबि लामिछानेको नाम, रकम, मिति र कैफियतसहितसँग सम्बन्धित छन् । अर्कोतर्फ रबि लामिछानेले सहकारीको रकम अपचलनमा आफू निर्दोष रहेको र कान्तिपुरले निराधार आरोप लगाएको दाबी गर्दै आएका छन् ।

यही क्रममा नागरिकता दुरुपयोग गरेको आरोपमा कान्तिपुर मिडिया ग्रुपका अध्यक्ष कैलाश सिरोहियालाई २०८१ जेठ ९ गते प्रहरीले पक्राउ गर्‍यो । कान्तिपुर र रबि लामिछानेबीच तनाव चलिरहेकै बेला मन्त्री लामिछानेसँग कान्तिपुरले माफी मागेको दाबी सामाजिक संजालमा पोस्ट गरिएको छ ।

तथ्यजाँच: दाबीसहितको आजावमा जोडिएको लोगो eKantipur को फेसबुक पेज हो । दुई मिनेट मिनेटअघि मात्रै इकान्तिपुरको फेसबुक पेजमा पोस्ट गरिएकोजस्तो देखिने ‘वाक्य’ टिकटकमा टिकटकमा फैलाइएको छ ।

तर, eKantipur को फेसबुक पेजमा त्यस्तो कुनै ‘माफीसहितको वाक्य’ पोस्ट गरिएको पाइएन । इकान्तिपुरको आधिकारिक फेसबुक पेजलाई स्क्रिनसट गरेर उक्त तस्बिरमा ‘दाबीसहितको वाक्य’ र कुने अज्ञात आवाज जोडेर सामाजिक संजालमा फैलाइएको छ । कान्तिपुरले आफ्नो फेसबुक पेजमा रबि लामिछानेसँग माफी मागेको स्ट्याटस पोस्ट गरेको छैन ।

अर्कतर्फ यो तथ्यजाँच गर्दैगर्दा इकान्तिपुर डटकममा अध्यक्ष सिरोहिया रिहा भएको समाचार प्रकाशित भएको छ । सो समाचारको सुरुवातमै लेखिएको छ- ‘सहकारी ठगी लगायत विषयमा श्रृंखलाबद्ध शोधपूर्ण समाचार प्रकाशित गरेको प्रतिशोधमा उपप्रधान तथा गृहमन्त्री रवि लामिछानेको निर्देशनमा पक्राउ परेका कान्तिपुर मिडिया ग्रुपका अध्यक्ष कैलाश सिरोहिया रिहा भएका छन् ।’