दाबी:  ‘Finally सन्दीप लामिछानेलाई अमेरिकन एम्बेसीले दियो भिसा दिएको छ’ । ‘Finally सन्दीप लामिछानेलाई भिसा दिएको छ’ । ‘सन्दीप लामिछानेलाई अमेरिकी एम्बेसीले भिसा दिएको छ, अब उनी T20 World Cup खेल्न छिट्टै अमेरिका जानेछन्’ । 

दाबीमा जोडिएका सामग्री: क्रिकेटर सन्दीप लामिछानेले खेल अभ्यास गरिरहेको भिडियो । उनी बोलिरहेको तस्बिरसँग जोडेर साथै अज्ञात स्क्रिनसटमा लामिछानेलाई अमेरिकन दूतावासले भिसा दिएको दाबी गरिएको छ ।

दाबी भेटिएको माध्यम/दाबीकर्ता: टिकटक, tiktok.com/@lamichhane901, tiktok.com/@nepcric_25 लगायतका प्रयोगकर्ता ।

तथ्य: आईसीसी टी–२० विश्वकप खेल्नका लागि अमेरिका जान तयार क्रिकेटर सन्दीप लामिछानेलाई अमेरिकन एम्बेसीले भिसा दिएको छैन । काठमाडौँस्थित अमेरिकी दूतावासले दोस्रो पटक पनि भिसा दिन अस्वीकार गरेको छ ।

नतिजा: भ्रामक

सन्दर्भ जाँच: २ जेठ २०८१ मा उच्च अदालतले बलात्कारको मुद्दामा सफाइ दिएपछि क्रिकेट एसोसिएशन नेपाल (क्यान)ले सन्दीप लामिछानेमाथि लगाएको प्रतिबन्ध फुकुवा गरेको थियो । सबै बाटो खुला भएपछि सन्दीपले आईसीसी टी-२० विश्वकप खेल्न अमेरिका जाने तयारी गरेका थिए ।

तर, काठमाडौँस्थित अमेरिकी दूतावासले आफूलाई भिसा नदिएको खबर उनले सार्वजनिक गरे । यो खबर सार्वजनिक भएपछि सन्दीपका समर्थकहरु सडक प्रदर्शनमै उत्रिए । त्यसपछि सन्दीपले भिसाका लागि दोस्रो पटकसमेत आवेदन दिएका थिए । घटनाक्रमहरुका यिनै सन्दर्भमा सन्दीपलाई अमेरिकन दूतावासले भिसा दिएको दाबी गरिएको छ ।

तथ्यजाँच: यो तथ्यजाँच प्रकाशित गरेकै दिन अमेरिकी दूतावसले सन्दीपलाई दोस्रो पटक पनि भिसा दिन अस्वीकार गरेको छ ।

अमेरिकी दूतावासले सन्दीप लामिछानेको भिसा आवेदन अस्वीकार गरेपछि अमेरिका र वेस्ट इन्डिजमा हुने आईसीसी टी-२० विश्वकपमा १५ सदस्यीय नेपाली टोलीले नै निरन्तरता पाउने भएको समाचार नेपालखबर डटकमले प्रकाशित गरेका छ । यही क्रममा क्यानलेसमेत वक्तव्य जारी गरेको छ ।