दाबी: ‘तिमिसँग निहुँ खोज्नु मेरो गल्ती भयो मलाई माफ गरिदेउ बाबु ।’
दाबीमा जोडिएका सामग्री: नेकपा (एमाले)का अध्यक्ष केपी शर्मा ओलीले नमस्ते गरिरहेको र काठमाडौँ महानगरका मेयर बालेन शाह उभिएको तस्बिरमा दाबीसहितको थमनेल जोडिएको छ ।
तथ्य: केपी शर्मा ओलीले बालेन शाहलाई ‘तिमिसँग निहुँ खोज्नु मेरो गल्ती भयो मलाई माफ गरिदेउ बाबु’ भनेका छैनन् । पूरानो र फरक सन्दर्भको तस्बिरको थमनेल अज्ञात वाक्यांश जोडेर सामाजिक संजालमा पोस्ट गरिएको छ ।
नतिजा: भ्रामक
सन्दर्भ जाँच: २०८१ जेठ २१ गते न्युरोडको फुटपाथ विस्तारका लागि महानगरले भत्काइरहेको रोड सडक विभागले पिच गरेको थियो ।
सोही दिन विहानै पूर्वप्रधानमन्त्री केपी शर्मा ओलीबारे काठमाडौँका मेयर बालेन शाहले फेसबुकमा भ्रष्टाचारको आरोप लगाएका थिए ।
यही दिउँसो संसद्मा पुगेका ओलीलाई संचारकर्मीले बालेनको आरोपबारे प्रश्न सोधेका थिए तर उनले आक्रोशित हुँदै ‘बालेनलाई सोध्नू’ भन्ने प्रतिक्रिया दिएका थिए । यही सन्दर्भमा ओली र बालेनको तस्बिरमा दाबीसहितको वाक्यांश जोडेर सामाजिक संजालमा पोस्ट गरिएको छ ।
तथ्यजाँच: केपी शर्मा ओली र बालेन शाहबीचको तनाब र सामाजिक संजालमा पोस्ट गरिएको तस्बिरबीच कुनै सम्बन्ध छैन । २०७९ जेठ १७ गते नेपाल प्रेस डटकम, नागरिक न्युज डटकम लगायतका संचार माध्यममा उक्त तस्बिर प्रकाशित गरिएको थियो ।
तस्बिरसँगै प्रकाशित समाचार अनुसार काठमाडौँ महानगरपालिकाको मतगणना चलिरहेका बेला मेयरका प्रत्याशी बालेन शाहले केपी शर्मा ओलीलाई उनकै निवासमा पुगेर भेटेका थिए । सोही सन्दर्भको तस्बिरलाई वर्तमान सन्दर्भसँग जोड्दै सामाजिक संजालमा फैलाइएको पाइयो ।
अर्कोतर्फ ओलीले बालेनलाई सार्वजिक रुपमा ‘तिमिसँग निहुँ खोज्नु मेरो गल्ती भयो मलाई माफ गरिदेउ बाबु’ भनेका छैनन् ।
