दाबी: ‘सन्दीप लामिछानेमाथि आरोप लगाउने केटीको बयान, सन्दीप लामिछानेमाथि आरोप लगाउने केटी ।’ 

दाबीमा जोडिएका सामग्री: सन्दीप लामिछानेमाथि आरोप लगाउने केटी भन्दै पोस्ट गरिएको भिडियोमा एक युवतीले आफू बनात्कार भएको बताइरहेकी छन् । भिडियोमा उनले भनेकी छन्- ‘पाँच मिनेटपछि बल्लबल्ल उठ्न सकेँ अनि उठ्दाखेरी त म पूरै नेक्ट । मेरो एउटा पनि कपडा थिएन ।  भित्र लगाउने पनि कुनै थिएन । म त पूरै लुगा लगाएर सुतेको थिएँ नि त । त्यसपछि उठ्दाखेरी त्यस्तो थियो अनि त्यो होटेलको ढोका पनि खुल्लै थियो, अनि एकपछि त एकैचोटी उठ्दाखेरी ला के भयो म कहाँ छु कसरी यस्तो भयो, कल्ले यस्तो गर्‍यो भनेर म त एकछिन सक्ड भएँ हैन, एकछिन डर लाग्यो । छिट्छिटो ढोका लगाएर अनि लुगा लगाएर एकछिन सोच्दाखेरी त ए त्यो केटा थियो अनि यस्तो भको थियो भनेर मलाई याद आयो हैन ।त्यही भएन अनि पूरै त्यो पार्ट पनि सुन्निएको थियो, अनि त्यसपछि डाक्टरले स्पर्म झिक्दाखेरी पनि यस्तो भन्नुभएको- कति धेरै स्पर्म ? भनेर भन्नुभयोको थियो क्या । अनि मेरो अन्डरवयरमा पनि ब्लड थियो क्या । त्यो अन्डरवयर पनि मेडिकलको डाक्टरले राख्नुभो ।’  

दाबी भेटिएको माध्यम/दाबीकर्ता: tiktok.com/@nepalcricket99 नामक टिकटक प्रयोगकर्ता । Ramailo Nepal नामक युट्युब च्यानल । resham bc नामक युट्युब च्यानल । Akshit Gyan नामक युट्युब च्यानल । हरियो पाटी नामक फेसबुक पेज ।

तथ्य: ‘सन्दीप लामिछानेमाथि आरोप लगाउने केटीको बयान’ भन्दै सामाजिक संजालहरुमा फैलाइएको भिडियो क्रिकेटर सन्दीप लामिछानेसँग सम्बन्धित छैन । फरक सन्दर्भको घटनाबारे बलात्कार पीडित किशोरीले संचार माध्यमलाई सुनाएको विवरणसहितको भिडियो अंशलाई क्रिकेटर सन्दीप लामिछानेसँग जोडिएको छ ।

नतिजा: भ्रामक 

सन्दर्भ जाँच: २०८१ जेठ २ गते  पाटन उच्च अदालतले बलात्कार मुद्दामा क्रिकेटर सन्दीप लामिछानेलाई सफाइ दियो । यसअघि सोही मुद्दामा सन्दीपलाई काडमाडौँ जिल्ला अदालतले लामिछानेलाई दोषी ठहर गरेको थियो ।

पीडित किशोरीको (गौशाला २६) फाइदा उठाएर बलात्कार गरेको ठहर  गर्दै जिल्ला अदालतका न्यायाधीश शिशिर ढकालको इजलासले सन्दिपलाई ८ वर्ष कैद सजायको फैसला गरेको थियो । जिल्ला अदालतको फैसलाविरुद्ध उच्चले सन्दीपलाई सफाइ दिएको हो ।

यिनै घटनाक्रमका ‘सन्दीप लामिछानेमाथि आरोप लगाउने केटीको बयान’ एउटा भिडियो सामाजिक संजालमा फैलाइएको छ ।

तथ्यजाँच: सन्दीप लामिछालेको नामक जोड्दै दाबीसहित सामाजिक संजालहरुमा फैलाइएको भिडियो ‘गौशाला २६’ को होइन ।

२०७९ भदौ २० गते नेपाल प्रेस डटकम (nepalpress.com) संचार माध्यमले ‘रमाइलाे गर्न नाइट क्लव जाँदा बलात्कारीकाे जालमा परेँ’ शिर्षकको सामग्री सार्वजनिक गरेको थियो ।

उक्त सामग्रीको अन्तिममा उल्लेखित सम्पादकीय नोटमा लेखिएको छ- ‘पीडितले नेपालप्रेसको कार्यालयमा आएर सुनाएको कथा हामीले जस्ताको तस्तै पस्केका छौं । पीडितको अनुरोधमा नाम परिवर्तन गरिएको छ । घटनाका आरोपित पक्षसँग सम्पर्क गर्ने हाम्रो प्रयास सफल हुन सकेन । यस घटनाका विषयमा महानगरीय प्रहरी वृत्त दरबारमार्गमा बुझ्दा जाहेरी परेको र अनुसन्धान जारी रहेको बताइयो ।’

यसरी सन्दीप लामिछानेसँग असम्बन्धित घटनालाई सामाजिक संजालभर पोस्ट गरिएको छ ।