दाबी: ‘अमेरिकामा सोमपाल कामीमाथि विभेद ।’

दाबीमा जोडिएका सामग्री: भिडियो, जहाँ राष्ट्रिय क्रिकेट टोलीका खेलाडी तथा कोच लगायतका मानिसहरु मन्दिरमा आशिर्वाद लिइरहेको दृश्य देख्न सकिन्छ । सोही भिडियोलाई आधार बनाएर ‘अमेरिकामा सोमपाल कामीमाथि विभेद’ भएको दाबीसहितका समाचार एवं धारणाहरु इन्टरनेटमा पोस्ट गरिएको छ ।

दाबी भेटिएको माध्यम/दाबीकर्ता: समाचार पोर्टल, युट्युब च्यानलहरु र व्यापक सामाजिक संजाल प्रयोगकर्ताहरु ।

तथ्य: नेपालीहरुले अमेरिकामा स्थापना गरेको मन्दिरमा नेपाली क्रिकेटर सोमपाल कामीलाई टीका नलगाएर विभेद गरिएको भन्ने दाबीलाई कुनै तथ्यले प्रमाणित गरेन । सोमपाललाई पुजारीले टीका लगाइरहेको दृश्य मन्दिर परिसर लगाइएका सीसीटीभी क्यामराले कैद गरेका छन् ।

नतिजा: भ्रामक 

सन्दर्भ जाँच: आइसिसी टी-ट्वेन्टी विश्वकप क्रिकेट प्रतियोगिता खेल्नका लागि अमेरिका पुगेका नेपाली क्रिकेट खेलाडीहरु २०८१ जेठ २१ गते टेक्ससको युलेस सिटीस्थित पशुपतिनाथ मन्दिर तथा बौद्ध बिहार पुगेका थिए ।

नेपाली समाजले आयोजना गरेको स्वागत कार्यक्रम अन्तर्गत क्रिकेट टीमका मुख्य कोच मोन्टी देसाइ, टीम कप्तान रोहित पाैडेल, खेलाडीहरू गुलशन झा, सोमपाल कामी लगायतले पशुपतिनाथ मन्दिरमा पुजा अर्चना गरेका थिए ।

सोही क्रममा मन्दिरका प्रमुख पुजारी डा.शेखर पण्डित र मेघराज निरौलाले वेदको स्वस्ती वाचन गर्दै जितको शुभकामना दिएका थिए । पूजा सकिएपछि प्रसाद र टीका ग्रहण गर्दा खिचिएको भिडियोलाई आधार बनाएर  ‘सोमपाल कामीमाथि विभेद’ भएको दाबी इन्टरनेटमा फैलाइएको छ ।

तथ्यजाँच: Multimedia नामक फेसबुक पेजमा पोस्ट गरिएको भिडियोलाई अमेरिकामा सोमपाल कामीमाथि विभेद भएको दाबीसहित सामाजिक संजालमा सबैभन्दा धेरै फैलाइएको छ ।

तर, यो भिडियोमा कुनै दाबी गरिएको छैन । यही भिडियोमा दाबी जोडेर इन्टरनेटमा फैलाइएको छ । यो भिडियोमा पूजा सकिएपछि कोच र खेलाडी लगायतले प्रसाद र टीका ग्रहण गरिरहेको दृश्य देख्न सकिन्छ । साथै आफूभन्दा अगाडि सबैले टीका ग्रहण गर्दा सोमपाल कामीलाई भने प्रसाद मात्र दिइन्छ । उनीपछि अरुले पनि टीका र प्रसाद ग्रहण गर्छन् ।

यही क्रममा Nepal Tube र Himalaya Khabar नामक युट्युब च्यानलले उक्त पूजा स्थलको सीसीटीभी फूटेज सार्वजनिक गरेका छन् । ती फूटेजहरुमा सोमपाल कामीलाई मन्दिरका पुजारीहरुले टीका ग्रहण गराएको दृश्य देख्न सकिन्छ ।