दाबी: नेपाल, जिल्ला जाजरकोट २०८१ जेठ ३१ गते आजको (बाढी आएको भिडियो)

दाबीमा जोडिएका सामग्री: एउटा भिडियो जोडिएको छ, एउटा नदिमा भयानक बाढी आएको दृश्य देख्न सकिन्छ । सोही भिडियोको थमनेलमा जाजरकोट २०८१ जेठ ३१ गते भन्ने वाक्यांश लेखिएको छ । 

दाबी भेटिएको माध्यम/दाबीकर्ता: टिकटक पोस्ट, https://www.tiktok.com/@sanjay_sahani31 नामक प्रयोगकर्ता ।

तथ्य: दाबीसहितको भिडियोमा देखिने दृश्य जाजरकोट जिल्ला वा नेपालसँग नै सम्बन्धित छैन । २०२२ मा पाकिस्तानको स्वात भ्यालीमा ठूलो बाढी आएको थियो । सोही सन्दर्भमा स्वात भ्यालीस्थित मडियन पुल वरिपरीको दृश्य (Swat Valley, Madyan Bridge, Pakistan) भाइरल भएको थियो, पछिल्लो समय यही दृश्यलाई जाजरकोट भन्दै सामाजिक संजालमा पोस्ट गरिएको छ ।

नतिजा: भ्रामक 

सन्दर्भ जाँच

नेपालमा मनसुन प्रवेश गरिसकेको छ तर अधिकांश भूभागमा वर्षा भएको छ । यही सन्दर्भमा ‘नेपाल, जिल्ला जाजरकोट २०८१ जेठ ३१ गते आजको’ भन्दै एउटा नदिमा भयानक बाढी आएको दृश्य सामाजिक संजालमा फैलाइएको छ । अघिल्ला वर्षहरुमा मनसुन भित्रिएसँगै हुने वर्षाका करण नेपालका विभिन्न जिल्लामा बाढीपहिरोजन्य विपत्ति निम्निने गरेका छन् । यस वर्ष पनि बाढी पहिरोजन्य विपत्तिहरु निम्तिन सुरु भइसकेको छ । तर पछिल्लो समय कारण जाजरकोट जिल्लामा भयानक बाढी आएको छैन । 

तथ्यजाँच     

दाबीसहित सामाजिक संजालमा पोस्ट गरिएको भिडियो जाजरकोट जिल्लासँग सम्बन्धित नभएको प्रष्ट भएपछि हामीले जाँचका विभिन्न विधी प्रयोग गर्‍यौँ ।

businessinsider.com नामक वेबसाइटमा एउटा समाचार भेटियो, उक्त समाचार अनुसार पाकिस्तानमा २०२२ को बाढीले ठूलो जनधनको क्षति गरेको छ । सोही समाचारमा लिंक गरिएको सामाजिक संजालको एउटा भिडियो नेपालमा फैलाइएको दृश्यसँग मिल्दो छ । उक्त भिडियोसँगै ‘Madyan Bridge’  पनि लेखिएको छ ।

यही क्रममा SAMAA TV नामक च्यानलमा पोस्ट गरिएको भिडियोमा पनि सोही सन्दर्भको रिपोर्ट छ । उक्त रिपोर्टमा रिपोर्टरले Swat Valley स्थित Madyan Bridge को दृश्य देखाएका छन् । यो भिडियोलाई राम्ररी नियाल्दा नेपालमा फैलाइएको दृश्यसँग मिल्दो छ । 

google map मा Swat Valley, Madyan Bridge बारे जाँच गर्दा बाढीका दृश्यहरु त फेला परेनन् । नेपालमा फैलाइएको दृश्यसँग मिल्दो भूबनोटसहितको क्षेत्रको तस्बिर फेला परेका छन् । हेर्नुहोस् तस्बर  

त्यस्तै Nainvidfactory.512 र pakmohmand627 नामक युट्युब च्यानलमा छोटा भिडियोहरु पोस्ट गरिएको छ, जसलाई Swat Valley, Madyan Bridge वरिपरिका क्षेत्रका रुपमा चिनाइएको छ । यी भिडियोहरु भिडियो नेपालमा फैलाइएका दृश्यसँग दुरुस्तै मिलेका छन् । 

अन्तिमलाई हामीले earth.google मा Swat Valley, Madyan Bridge को दृश्य नियाल्यौँ । earth.google मा देखिएको दृश्य र जाजरकोट जिल्ला भन्दै सामाजिक संजालमा फैलाइएको दृश्य दुरुस्तै मिलेको छ । 

यी तथ्यहरुबाट नेपालमा फैलाइएको दाबीसहितको दृश्य नेपालको होइन भन्ने प्रमाणित हुन् । २०२२ मा स्वात भ्यालीमा बाढीको ठूलो विपत्ति निम्तिएको थियो ।

सोही क्रममा खिचिएको मडियन पुल वरिपरीको (Swat Valley, Madyan Bridge, Pakistan) दृश्यलाई जाजरकोट भन्दै सामाजिक संजालमा पोस्ट गरिएको छ ।