दाबी: भिडियो (कुवेतको मङ्गाफमा भीषण आगलागी) ।
दाबीमा जोडिएका सामग्री: इन्टरनेटमा एउटा भिडियो फैलिरहेको छ, उक्त भिडियोमा एउटा ठूलो भवन र वरिपरिको क्षेत्रमा भीषण आगलागी भइरहेको देखिन्छ । साथै आगलागी भइरहेको भवनको छतमाथि एकजना व्यक्ति छट्पटाइरहेका छन् । भिडियोसँगै कुवेतको मङ्गाफमा भीषण आगलागी भएको र नेपालीसमेत घाइते भएको जानकारी जोडिएको छ ।
दाबी भेटिएको माध्यम/दाबीकर्ता: फेसबुक- रग बहादुर साउद, Manakamanaupdate.com लगायतका प्रयोगकर्ता । टिकटक- tiktok.com/@sarita Rai, tiktok.com/@bijayalama026 लगायतका प्रयोगकर्ता । अन्य सामाजिक संजाल एवं इन्टरनेटभर फैलिएको भेटियो ।
के हो तथ्य: कुवेतको मङ्गाफमा भीषण आगलागी भएको जानकारीसहित इन्टरनेटमा फैलाइएको भिडियो अंश कुवेतको आगलागीसँग सम्बन्धित छैन । केही दिनअघि बहराइनको राजधानी सौक मनामा ठूलो आगलागी भएको थियो, सोही आगलागीको भिडियोलाई कुवेतको आगलागीसँग जोड्दै इन्टरनेटमा फैलाइएको छ ।
नतिजा: भ्रामक
सन्दर्भ जाँच
२०२४ जुन १२ मा कुवेतको दक्षिणी शहर मङ्गाफस्थित विदेशी कामदार राखिएको आवासीय भवनमा खतरनाक आगलागी भएको थियो । CNN का अनुसार आगलागीमा परी कम्तिमा ४९ जनाले ज्यान गुमाइसकेका छन् ।
उक्त आगलागीमा नेपाली नागरिकले ज्यान गुमाएका छैनन् । तर, केही नेपाली कामदारले आवासीय भवनको झ्यालबाट हाम्फालेर ज्यान जोगाएको समाचार संचार माध्यमले प्रकाशित भएको छन् ।
कुवेत आगलागीकै सन्दर्भमा एउटा ठूलो भवन तथा वरिपरिको क्षेत्रमा आगो लागिरहेको र भवनको छतमाथि एकजना व्यक्ति छट्पटाइरहेको दृश्य इन्टरनेटमा फैलाइएको छ ।
तथ्यजाँच
२०२४ जुन १२ बहराइनको राजधानीस्थित सौक मनामा ठूलो आगलागी भएको थियो । कुवेतको मङ्गाफमा पनि सोही दिन आगलागी भएको हो ।
सौक मनामाका २५ भन्दा बढी पसलहरू ध्वस्त भएको समाचार Gulf News ले प्रकाशित गरेको छ । समाचार अनुसार उक्त आगो एउटा अग्लो आवासीय भवनबाट वरिपरि एवं व्यापारिक क्षेत्रमा फैलिएको थियो ।
यही सन्दर्भमा NEWS OF BAHRAIN नामक युट्युब च्यानलमा आगलागीको भिडियो पोस्ट गरिएको छ । उक्त भिडियो ‘Heros In Action: Bahrain Civil Defence Team Save Lives What happened at the Manama Souq?’ शिर्षकसहित पोस्ट गरिएको छ । त्यस्तै JABED ISLAM नामक युट्युब च्यानलमा पनि उस्तै देखिने भिडियो पोस्ट गरिएको छ ।
यी दुई भिडियो र दाबीसहितको दृश्यबीच धेरै समानता देखिन्छ । तर, फेला परेका भिडियो कुवेतको आगलागीसँग सम्बन्धित छैनन्, बहराइनस्थित सौक मनामाको आगलागीसँग सम्बन्धित छन् ।
आगलागी भएको भवनको छतमाथि एकजना व्यक्ति छट्पटाइरहेको दृश्य भिडियोमा देख्न सकिन्छ । भवनमाथि फसेका व्यक्तिलाई बहराइनको द सिभिल डिफेन्सको टीमले जाँच घण्टापछि पानी ट्याङ्कीबाट उद्दार गरेको समाचार newsofbahrain.com ले प्रकाशित गरेको छ ।
फेला परेका तथ्यहरुबाट के पुष्टि हुन्छ भने कुवेतको मङ्गाफमा भीषण आगलागी भएको जानकारीसँगै सामाजिक संजालमा फैलाइएको भिडियो कुवेतको आगलागीसँग सम्बन्धित छैन । बहराइनमा आगलागी भएको घटनासँग सम्बन्धित भिडियोलाई कुवेतको घटनासँग जोडिएको छ ।
