दाबी: रबिसँग माफी माग्दै ऋषि धमालाले भने- अब गल्ती गर्दिनँ, म पनि मान्छे हु रबिजी, हेर्नुहोस्

दाबीमा जोडिएका सामग्री: पत्रकार ऋषि धमलाले भाषण गरिरहेको एउटा भिडियो, जसमा गृहमन्त्री रबि लामिछानेसँगै राष्ट्रिय स्वतन्त्र पार्टी (रास्वपा) मन्त्री तथा नेताहरु देख्न सकिन्छ । सोही भिडियोको थमनेल तथा शिर्षकमा ऋषि धमलाले रबिसँग माफी मागेको दाबीसहितको वाक्यांश लेखिएको छ । 

दाबी भेटिएको माध्यम/दाबीकर्ता: टिकटक- tiktok.com/@devbohara00 प्रयोगकर्ता । युट्युब- Right Sanchar च्यानल ।

के हो तथ्य: पत्रकार ऋषि धमलाले गृहमन्त्री रबि लामिछाने समक्ष माफी मागेका छैनन् । क्याफोडेट कलेजको एउटा कार्यक्रममा भाषण गर्दै ऋषि धमलाले कलेजका अध्यक्ष (पाण्डे सर) को प्रशंसा गरेका थिए । साथै उनले कलेजका गुरुहरु समक्ष विगतमा आफूबाट गल्ती-कमजोरी भएपनि ‘कलेजमा आइसकेपछि आजबाट गल्ती गर्दिनँ’ भन्ने संकल्प गरेको घोषणा गरेका थिए ।

नतिजा: भ्रामक 

सन्दर्भ जाँच 

२०८१ असार १ गते क्याफोडेट कलेजमा एउटा कार्यक्रम आयोजना गरिएको थियो । उक्त कार्यक्रममा अतिथी वक्ताका रुपमा चर्चित पत्रकार ऋषि धमलालाई बोलाइएको थियो ।

कार्यक्रममा कलेजका विद्यार्थी एवं गुरुहरु समक्ष ऋषि धमलाले सम्बोधन गरेका थिए । सोही सन्दर्भको भिडियोमा ऋषि धमलाले गृहमन्त्री रबि लामिछानेसँग माफी मागेको दाबीसहित सामाजिक संजालमा पोस्ट गरिएको छ ।   

तथ्यजाँच  

क्याफोडेट कलेजमा पत्रकार ऋषि धमलाले भाषण गरेको भिडियो Prime Times HD ले युट्युब च्यानलमा पोस्ट गरेको छ । उक्त मूल भिडियोमा न गृहमन्त्री रबि लामिछाने देखिएका छन् न राष्ट्रिय स्वतन्त्र पार्टी (रास्वपा) मन्त्री तथा नेताहरु ।

किनकि उक्त कलेजको कार्यक्रममा गृहमन्त्री रबि लामिछाने पुगेका थिएनन् ।  क्याफोडेट कलेजमा ऋषि धमलाले गरेको भाषणको भिडियोलाई इडिटगरी गृहमन्त्री रबि लामिछाने लगायतका नेताहरु देखिने अर्को सन्दर्भको भिडियोलाई जोडिएको छ ।

अर्कोतर्फ कलेजको कार्यक्रममा ऋषि धमलाले गृहमन्त्री रबि लामिछानेसँग माफी पनि मागेका छैनन् । भाषणमा ऋषि धमलाले काठमाडौँ महानगरका मेयर बालेन शाहको प्रसंसा गरेका थिए । तर, रबि लामिछानेको नाम नै लिएका थिएनन् ।

धमलाले कलेजका गुरु-विद्यार्थी समक्ष विगतमा आफूबाट गल्ती-कमजोरी भएपनि ‘कलेजमा आइसकेपछि आजबाट गल्ती गर्दिनँ’ भन्ने संकल्प गर्दै भनेका थिए-  ‘म गुरुहरुलाई आग्रह गर्न चहान्छु, यहाँ अगाडि बस्नुहुने सम्पूर्ण गुरुहरुलाई । मान्छेको सबभन्दा राम्रो कुरा एउटा संस्कार हो, अनुशासन हो । यदि मान्छे कोशी असल बन्न सक्छ भने त्यो अनुशासनले मात्रै हो । त्यसैले यहाँहरु सबैलाई म आज, विद्यार्थी साथीहरुलाई आग्रह गर्न चहान्छु, मेरा पनि विगतमा धेरै गल्ती-कमजोरी भए होला, म भगवान होइन म पनि मानवै हो । तर मैले एउटा उद्द्धोष गरेको छु, एउटा संकल्प गरेको छु । आजबाट यो कलेजमा आइसकेपछि अब म गल्ती गर्दिनँ ।’