दाबी: नेपाली कांग्रेसका महामन्त्री गगन थापाले ५० करोड रुपैयाँ भ्रष्टाचार गरेको पुष्टि, चाँडै नै पक्राउ पर्दै ।

दाबीमा जोडिएका सामग्री: पूर्वमन्त्री गगन थापाका केही तस्बिर, जसमा थमनेल र एउटा अडियो जोडिएको छ । उक्त अडियोमा भनिएको छ- गगन थापा पक्राउ पर्दै, ५० करोड रुपैयाँ प्रष्टाचार गरेको पुष्टि गगन थापाले…।

दाबी भेटिएको माध्यम/दाबीकर्ता: टिकटक- tiktok.com/@sarumagar1010 लगायतका प्रयोगकर्ता ।

के हो तथ्य: नेपाली कांग्रेसका महामन्त्री तथा पूर्व स्वास्थ्यमन्त्री गगन थापाले ५० करोड रुपैयाँ भ्रष्टाचार गरेको पुष्टि भएको र उनी छिट्टै जेल जान लागेको दाबी कुनैपनि तथ्यबाट प्रमाणित भएन । 

नतिजा: भ्रामक 

सन्दर्भ जाँच 

२०७३ सालमा पुष्पकमल दाहाल ‘प्रचण्ड’ नेतृत्वको मन्त्रीपरिषद्मा गगन थापा स्वास्थ्य तथा जनसंख्या मन्त्री भएका थिए । पछिल्लो समय नेपाली कांग्रसका महामन्त्री रहेका गगन थापाबारे सामाजिक संजालमा केही अपुष्ट दाबी गरिएका छन् ।

राजकुमार तिमिल्सिना नामक व्यक्तिले Nari TV Nepal, Nepal One HD  लगायतमा अन्तर्वार्ता दिएका छन् । अन्तर्वार्ताहरुमा राजकुमार तिमिल्सिनाले गगन थापा मन्त्री भएका बेला कराेडौँ भ्रष्टाचार गरेको दाबी गरेका छन् ।

यिनै अन्तर्वार्ताहरुलाई आधार बनाएर गगन थापाले ५० करोड रुपैयाँ भ्रष्टाचार गरेको पुष्टि भएको र उनी चाँडै नै पक्राउ पर्ने दाबी सामाजिक संजालमा गरिएको छ । 

तथ्यजाँच

गगन थापाले करोडौँ रुपैयाँ भ्रष्टाचार गरेको दाबी गर्ने राजकुमार तिमिल्सिना विवादित व्यक्ति हुन् । यसअघि उनले सिधाकुरा (sidhakura.com) उपलब्ध गराएको अडियो विवादित भइसकेको छ । 

सोही अडियोलाई आधार बनाएर सिधाकुराले अदालतका न्यायाधीश, वकिल र मिडिया सञ्चालकहरूविरुद्ध विभिन्न आरोपसहितको समाचाार प्रकाशन गरेको थियो । उक्त अडियोको छानविन गर्न सर्वोच्च अदालतको आदेश दिएपछि साइबर ब्युरोका प्रमुख डिआइजी नविन्द अर्यालको नेतृत्वमा छानबिन समिति बनेको थियो ।

सर्वोच्च अदालतमा मुद्दा विचाराधिन रहेपनि केही संचार माध्यमले छानबिन समितिको रिपोर्टको निष्कर्ष सार्वजनिक गरेका छन् ।

संचार माध्यमलाई अडियो उपलब्ध गराउनले राजकुमार तिमिल्सिनाले नै पछिल्लो समय गगन थापाले करोडौँ रुपैयाँ भ्रष्टाचार गरेको आरोप लगाउन थालेका छन् । तर, उनको आरोपलाई प्रमाणित गर्ने कुनैपनि तथ्य-प्रमाण सार्वजनिक भएको छैन ।

अर्कोतर्फ कुनैपनि निकायले अहिलेसम्म गगन थापाले ५० करोड भ्रष्टाचार गरेको पुष्टि गरेको छैन । न सोही आरोपका कारण थापालाई पक्राउ गर्न कुनै अदालतले आदेश दिएको छ ।