दाबी: जाजरकोट केन्द्र बनाएर ६.७ रेक्टरको भूकम्प । २०८१ असार ७ गते (भिडियोसहित)

दाबीमा जोडिएका सामग्री: एउटा भिडियो, जसमा मानिसहरु चिच्याइरहेका, रोइरहेका देखिन्छ । साथै सडक र वरिपरीका भवन हल्लिएपछि मानिसहरु आत्तिएको देख्न सकिन्छ । सोही भिडियोको थमनेलमा यही असारको पहिलो हप्ता जाजरकोट केन्द्रबिन्दू बनाएर ६.७ रेक्टरको भूकम्प भएको दाबी गरिएको छ ।

दाबी भेटिएको माध्यम/दाबीकर्ता: टिकटक- tiktok.com/@kingarjun71 प्रयोगकर्ता । 

के हो तथ्य: पछिल्लो समय जाजरकोटमा कुनैपनि किसिमको भूकम्प मापन गरिएको छैन । सन् २०१५ को महाभूकम्प गएका बेला काठमाडौँको सीसीटीभी क्यामराले कैद गरेको दृश्यलाई जाजरकोट भन्दै सामाजिक संजालमा पोस्ट गरिएको छ ।

नतिजा: भ्रामक

सन्दर्भ जाँच: जाजरकोटमा कहिले गयो भूकम्प? 

नेपाल सरकारको राष्ट्रिय भूकम्प मापन तथा अनुसन्धान केन्द्रको तथ्यांक अनुसार पछिल्लो ५ महिनामा नेपालभित्रका ६ वटा स्थानलाई केन्द्रबिन्दू बनाएर मध्यम स्तरका भूकम्प गएका छन् । तर, यो अवधिमा जाजरकोटमा कुनैपनि भूकम्प मापन गरिएको छैन ।

यसअघि २०८० कार्तिक १७ गते राति जाजरकोटमा केन्द्रबिन्दू भई भूकम्प गएको थियो । बिबिसी नेपाली (bbc.com/nepali) का अनुसार जाजरकोटमा गएको ६.४ म्याग्निट्यूडको भूकम्पले पश्चिम नेपालका विभिन्न जिल्लामा ठूलो जनधनको क्षति भएको थियो । तर, वर्तमान समयमा दाबीसहित सामाजिक संजालमा फैलाइएको भिडियो र आठ महिनाअघिको जाजरकोट भूकम्पबीच कुनै सम्बन्ध छैन ।

तथ्यजाँच: काठमाडौँको सीसीटीभी भिडियोलाई भनियो जाजरकोट 

Kantipur TV HD ले २४ अप्रिल २०१५ को भूकम्प भन्दै युट्युबमा एउटा भिडियो पोस्ट गरेको छ । २०१५ मै पोस्ट गरिएको भिडियोको शिर्षकमा लेखिएको छ-  ‘भूकम्पको बेला थापाथलीको सीसीटीभी फुटेज’ (CCTV footage of Thapathali during Earthquake on 25 April 2015) ।  यही भिडियोलाई २०८१ असार ७ गते जाजरकोटमा ६.७ रेक्टरको भूकम्प गयो भन्दै सामाजिक संजालमा पोस्ट गरिएको छ ।

https://www.youtube.com/watch?v=VCvHSBFvQew  

तर, यो भिडियो जाजरकोट जिल्लासँग सम्बन्धित छैन । २०७२ (सन् २५ अप्रिल २०१५) सालमा गोरखा जिल्लास्थित बारपाक केन्द्रबिन्दू बनाएर ठूलो भूकम्प गएको थियो, जसलाई महाभूकम्पका रुपमा पनि चिनिन्छ । उक्त विपत्तिबाट नेपालले ठूलो जनधनको क्षति व्यहोरेको थियो । सोही महाभूकम्प गइरहेका बेला काठमाडौँस्थित थापाथलीको एउटा सीसीटीभी क्यामरामा सडकको दृश्य कैद भएको थियो । उक्त दृश्यलाई वर्तमान समयमा जाजरकोट भन्दै सामाजिक संजालमा पोस्ट गरिएको छ ।