दाबी: नागढुङ्गा-काठमाडौँ सुरुङमार्ग, ५ मिनेटमा काठमाडौँ (भिडियो)
दाबीमा जोडिएका सामग्री: एउटा भिडियो, जसमा अत्याधुनिक सुरक्षा र सुविधा सहितको सुरुङमार्ग देख्न सकिन्छ । उक्त सुरुङमार्गमा सवारीसाधनहरु प्रवेश गरिरहेका छन् । सोही भिडियोमा ‘नागढुङ्गा-काठमाडौँ सुरुङमार्ग’ र ‘पाँच मिनेटमा काठमाडौँ’ लेखिएको छ ।
दाबी भेटिएको माध्यम/दाबीकर्ता: टिकटक- tiktok.com/@cva.khadka7 नामक प्रयोगकर्ता ।
के हो वास्तविकता: ‘नागढुङ्गा-काठमाडौँ सुरुङमार्ग’ भन्दै सामाजिक संजालमा पोस्ट गरिएको भिडियो नेपालसँग सम्बन्धित छैन । पोर्चुगलको ‘ग्रिलो टनेल’ नामक सुरुङमार्ग नेपालको राजधानी काठमाडौँसँग जोड्दै सामाजिक संजालमा पोस्ट गरिएको छ ।
नतिजा: भ्रामक
काठमाडौँसँग जोड्दै सामाजिक संजालमा गरिएको पोस्ट ।
सन्दर्भ जाँच: के नागढुङ्गा सुरुङमार्गमा सवारीसाधन चलेका छन्?
२०८१ वैशाख ३ प्रधानमन्त्री पुष्पकमल दाहाल ‘प्रचण्ड’ले नागढुङ्गा–सिस्नेखोला सुरुङमार्ग ब्रेक थ्रु गरेका थिए । २६८८ मिटर लामो यो सुरुङमार्गले धादिङको सिस्नेखोलालाई काठमाडौँस्थि चन्द्रागिरि नगरपालिका जोड्छ । नागढुङ्गा–सिस्नेखोला सुरुङमार्ग ब्रेक थ्रु भएपनि संचालनमा आएको छैन ।
नागढुङ्गा-सिस्नेखोला सुरुङमार्ग आयोजनालाई उदृत गर्दै सुरुङबाट सवारीसाधन संचालन गर्न अरु एक वर्ष लाग्ने जानकारीसहितको सामाचार संचार माध्यमले प्रकाशित गरेका छन् । नागढुङ्गा सुरुङमार्ग संचालन नै नभएको अवस्थामा एउटा भिडियो र दाबीसहितका वाक्यांशलाई सामाजिक संजालमा पोस्ट गरिएको छ ।
तथ्यजाँच: पोर्चुगलको सुरुङमार्गलाई काठमाडौँसँग जोडियो
पोर्चुगलस्थित ‘ग्रिलो टनेल’ सुरुङमार्गसँग सम्बन्धित भिडियोलाई ‘नागढुङ्गा-काठमाडौँ सुरुङमार्ग’ भन्दै सामाजिक संजालमा पोस्ट गरिएको छ । jornaleconomico.sapo.pt र infraestruturasdeportugal.pt वेबसाइटमा प्रकाशित समाचार र तस्बिर ‘ग्रिलो टनेल’ सुरुङमार्गसँग सम्बन्धित छन् ।
पोर्चुगलको सुरुङमार्गका तस्बिरहरु
दुबै वेबसाइटमा उल्लेख गरिएका तस्बिर र दाबीसहितको भिडियोमा देखिने दृश्यसँग धेरै समानता छ । ‘ग्रिलो टनेल’ पोर्चुगलस्थित ग्रेटर लिस्बन क्षेत्रमा निर्माण गरिएको सुरुङमार्ग हो ।
पोर्चुगलको सुरुङमार्गलाई गुगल स्ट्रीट भ्युमा जाँच गर्दा दाबीसहितको भिडियोसँग मिल्दो दृश्य फेला गरेको छ । यस तथ्यले पुष्टि गर्छ कि ‘नागढुङ्गा-काठमाडौँ सुरुङमार्ग’ भन्दै पोस्ट गरिएको भिडियो नेपालको नभई पोर्चुगलको ‘ग्रिलो टनेल’ हो ।
पोर्चुगलको सुरुङमार्गलाई देखाउने गुगल स्ट्रीट भ्युमा जाँच
