काठमाडौँको त्रिभुवन अन्तर्राष्ट्रिय विमानस्थलमा सौर्य एयरलाइन्सको जहाज दुर्घटना भएको भन्दै केही तस्बिरहरु सामाजिक संजालमा पोस्ट गरिएका छन् । तर, यी तस्बिरहरु सौर्य जहाज दुर्घटनाका होइनन् ।
दाबी समीक्षा
TV27News नामक एक्स ह्यान्डलमा जहाज दुर्घटनाग्रस्त भएको एउटा तस्बिर पोस्ट गरिएको छ । २०२४ जुलाई २४ मा पोस्ट गरिएको तस्बिरसँगै काठमाडौँमा सौर्य एयरलाइन्सको जहाज दुर्घटना भएको जानकारी लेखिएको छ ।
त्यस्तै Deenaram Dholiya नामक एक्स ह्यान्डलमा जहाज दुर्घटनाको अर्को तस्बिर पोस्ट गरिएको छ । २०२४ जुलाई २४ मा पोस्ट गरिएको यो तस्बिरको क्याप्सनमा पनि सौर्य एयरलाइन्सको जहाज दुर्घटना भएको जानकारी देखिएको छ । यही तस्बिर र जानकारी प्रीति चौहान एक्स ह्यान्डलमा पनि पोस्ट गरिएको देखिन्छ ।
तथ्यजाँच: जहाज दुर्घटनाका पुराना तस्बिर र वास्तविकता
२०८१ श्रावण ९ गते काठमाडौँको त्रिभुवन अन्तर्राष्ट्रिय विमानस्थलमा सौर्य एयरलाइन्सको जहाज दुर्घटना भएको थियो । यही सन्दर्भमा पोस्ट गरिएका तस्बिरहरु सौर्य जहाज दुर्घटनाका हुन् त ? वास्तविकता पत्ता लगाउन हामीले सबैभन्दा पहिले गुगल लेन्समा रिभर्स इमेज सर्च तथा गुगलमा वाक्यांश सर्च गर्यौँ ।
जाँचको नतिजास्वरुप फोक्स ४४ न्युज (fox44news.com) मा प्रकाशित तस्बिर र रिपोर्ट फेला पर्यो । २०२३ जनवरी १६ मा प्रकाशित रिपोर्टमा एपीका लागि अनिश भट्टराईले खिचेको तस्बिर उल्लेख गरिएको छ ।
उक्त रिपोर्ट अनुसार काठमाडौँबाट पोखरा पुगेको यति एयरलाइन्सको एटिआर ७२-५०० जहाज (उडान नं. ६९१) अवतरणका क्रममा दुर्घटनामा परेको थियो ।
पोखरामा यति एयरलाइन्सको जहाज दुर्घटना हुँदा खिचिएइको यिनै पुरानो तस्बिरलाई सौर्य एयरलाइन्सको जहाज दुर्घटनासँग जोड्दै सामाजिक संजालमा पोस्ट गरिएको देखिन्छ । त्यस्तै सौर्य एयरलाइन्सको जहाज दुर्घटना भन्दै अर्को तस्बिर पनि पोस्ट गरिएको छ ।
जाँचका क्रममा यो तस्बिर पनि पुरानो र फरक सन्दर्भको दुर्घटनासँग सम्बन्धित रहेको पाइयो । उक्त तस्बिर २०१८ मार्च १२ मा डीडब्लू (dw.com) ले समेत प्रकाशित गरेको देखिन्छ ।
समाचार एजेन्सी एपीको तस्बिरसँगै प्रकाशित समाचार अनुसार २०१८ मार्चमा बङ्लादेशको ढाकाबाट काठमाडौँ आएको युएस-बाङ्ला एयरलाइन्सको जहाज काठमाडौँस्थित त्रिभुवन अन्तर्राष्ट्रिय विमानस्थलमा दुर्घटनाग्रस्त भएको थियो । यही दुर्घटनाको तस्बिरलाई सौर्य एयरलाइन्सको जहाज दुर्घटनासँग जोडिएको देखियो ।
युएस-बाङ्ला एयरलाइन्सको जहाज दुर्घटनाको सोही तस्बिर र समाचार इन्डियन एक्प्रेस (indianexpress.com) ले समेत प्रकाशित गरेको देखियो ।
निष्कर्ष
काठमाडौँको त्रिभुवन अन्तर्राष्ट्रिय विमानस्थलमा सौर्य एयरलाइन्सको जहाज दुर्घटना भएको भन्दै पोस्ट गरिएका तस्बिरहरु पुराना र फरक सन्दर्भका हुन् । २०१८ को युएस-बाङ्ला जहाज दुर्घटना र २०२३ को यति जहाज दुर्घटनासँग सम्बन्धित तस्बिरलाई अहिलेको सौर्य जहाज दुर्घटनासँग जोड्दै सामाजिक संजालमा पोस्ट गरिएको छ ।
नतिजा: भ्रामक ।
यो पनि पढ्नुहोस्-
