राष्ट्रपति रामचन्द्र पौडेलले प्रधानमन्त्री केपी शर्मा ओलीविरुद्ध अभिव्यक्ति दिएको दाबीसहित एउटा अडियो सामाजिक संजालमा पोस्ट गरिएको छ । तर, उक्त अडियोलाई रुजू गर्दा राष्ट्रपति हुनुअघि नै रामचन्द्र पौडेलले बोलेको अडियोलाई सन्दर्भ नखुलाई वर्तमान सन्दर्भसँग जोडिएको देखियो ।
दाबी समीक्षा
surya subedi 9999 नामक टिकटक आइडीमा पोस्ट गरिएको भिडियोमा राष्ट्रपति रामचन्द्र पौडेलको तस्बिर देख्न सकिन्छ ।
तस्बिरसँगै एउटा अडियो पनि सुन्न सकिन्छ, जसमा पौडेलले भनेका छन्- ‘केपी ओली हतास भएका छन् र हतास अभिव्यक्ति दिइरहेका छन् र जस्ता तत्वसँग पनि हातेमालो गर्न पुगेका छन् । यो भ्रष्ट तत्वहरु, प्रतिगामीहरु र अवसरवादीहरुसँग मिलेर आज केपी ओली कहीँ नपाएर यस्ता तत्वको शरणमा पुगेका छन् ।’
त्यस्तै तस्बिरको थमनेलमा लेखिएको छ- ‘केपी ओली भ्रष्टसँग हातेमालो गर्दै राष्ट्रपति रामचन्द्र पौडेलको भनाई । देउवा-ओली मिल्दा देश समृद्ध होइन, संकटको भूमरीमा भासिने छ, देश झन उथलपुथल हुने ।’
प्रस्तुत सामग्री सामाजिक संजालमा द्रुत गतिमा फैलिरहेको छ । रामचन्द्र पौडेलको उक्त अडियोबाट १९ भन्दा बढी थप भिडियो पुनर्उत्पादन गरिएको देखिन्छ ।
के राष्ट्रपति रामचन्द्र पौडेलले प्रधानमन्त्री केपी शर्मा ओलीविरुद्ध अभिव्यक्ति दिएका हुन् त ? राष्ट्रपतिको आवाज जस्तै सुनिने अडियोको वास्तविकता पत्ता लगाउन हामीले तथ्यजाँच गरेका छौँ ।
तथ्यजाँच: पुरानो भाषणमा भ्रामक वाक्यांश जोडियो
दाबीसहितको सामग्रीको जाँचका क्रममा हामीले सबैभन्दा पहिले ‘केपी शर्मा ओलीविरुद्ध रामचन्द्र पौडेल’ ‘अभिव्यक्ति’ लगायतका वाक्यांशको जाँच गर्यौँ ।
जाँचको नतिजास्वरुप संचार माध्यममा प्रकाशित केही पुराना समाचार फेला परे । जसमध्ये सेतोपाटी (setopati.com) को समाचारमा हाम्रो ध्यान भयो । २०७९ वैशाख ६ मा प्रकाशित समाचार अनुसार तत्काली नेपाली कांग्रेसका वरिष्ठ नेता रहेका रामचन्द्र पौडेलले केपी शर्मा ओलीले हतास अभिव्यक्ति दिन थालेको आरोप लगाएका थिए ।
फेला परेको समाचार र दाबीसहितको सामग्रीमा जोडिएको तस्बिर उस्तै देखिन्छन् । यही आधारमा हामीले सेतोपाटीमा प्रकाशित समाचार शिर्षक ‘गठबन्धनको शक्ति देखेर केपी ओली थर्थरी काँपेका छन्: रामचन्द्र पौडेल’ लाई युट्युबमा जाँच गर्यौँ ।
जाँचको नतिजास्वरुप Setopati मा पोस्ट गरिएको पुरानो भिडियो फेला पर्यो । १९ अप्रिल २०२२ मा पोस्ट गरिएको भिडियोमा रामचन्द्र पौडेलले भाषण गरिरहेका छन् तर यो भाषण पौडेल राष्ट्रपति हुनुभन्दा अघिको हो ।
सामाजिक संजालमा पोस्ट गरिएको अडियो र फेला परेको पुरानो भिडियोको आजाव एकआपसमा मिलेका छन् । तर, त्यो भाषणमा पौडेलले कतैपनि ‘देउवा-ओली मिल्दा देश समृद्ध होइन, संकटको भूमरीमा भासिने छ’ भन्ने अभिव्यक्ति दिएको पाइएन ।
२०७९ फागुनमा रामचन्द्र पौडेल राष्ट्रपति निर्वाचित भएका थिए । यसको १० महिनअघि अर्थात् २०७९ वैशाखमा कांग्रेसका वरिष्ठ नेताका रुपमा पौडेलले विद्यार्थी संघको ५३औँ स्थापना दिवसको कार्यक्रमलाई सम्बोधन गरेका थिए । त्यो सन्दर्भमा नेपाली कांग्रेससहित नेकपा (माओवादी केन्द्र), नेकपा (एकीकृत समाजवादी) लगायतका दलहरुले सत्ता गठबन्धन बनाएका थिए भने केपी शर्मा ओली नेतृत्वको नेकपा (एमाले) प्रतिपक्षमा थियो ।
https://www.youtube.com/watch?v=UcouYQrsPkA
सोही फरक राजनीतिक समिकरण र कांग्रेस नेताको हैसियतमा पौडेलले दिएको अभिव्यक्तिलाई वर्तमान सन्दर्भसँग जोड्दै सामाजिक संजामा पोस्ट गरिएको छ ।
निष्कर्ष
राष्ट्रपतिका रुपमा रामचन्द्र पौडेलले प्रधानमन्त्री केपी शर्मा ओलीविरुद्ध कुनैपनि अभिव्यक्ति दिएका छैनन् । पौडेल राष्ट्रपति हुनुभन्दा अघिको भाषणमा भ्रामक वाक्यांश जोडेर सन्दर्भ नखुलाई वर्तमान सन्दर्भसँग जोडेर सामाजिक संजालमा पोस्ट गरिएको देखियो ।
नतिजा: भ्रामक
