पूर्वप्रधानमन्त्री तथा माओवादी केन्द्रका अध्यक्ष पुष्पकमल दाहाल प्रचण्ड र काठमाडौँ महानगरका मेयर बालेन शाहसँग सम्बन्धित सामग्री सामाजिक संजालमा फेला परेको छ । उक्त सामग्रीमा मेयर बालेनले प्रचण्डलाई साथ दिन सबैलाई अपील गरेको दाबी गरिएको छ ।
दाबी समीक्षा
subedi sun9999 नामक टिकटक आइडीमा पोस्ट गरिएको तस्बिरमा प्रचण्ड र बालेनलाई देख्न सकिन्छ । प्रस्तुत तस्बिरको थमनेलमा लेखिएको छ- ‘काठमाडौँ महानगरपालिकाका मेयर बालेन भन्छन्- प्रचण्डलाई अब सबैले साथ दिनुपर्छ, अहिलेको अवस्थामा प्रचण्ड प्रचण्ड नै रहेछन् ।’ प्रस्तुत दाबीसहितको सामग्रीमा ३ हजारभन्दा बढी टिकटक प्रयोगकर्ताले रियाक्ट गरिसकेका छन् ।
के मेयर बालेनले प्रचण्डलाई सबैले साथ दिनुपर्ने अपील गरेका हुन् त ? दाबीसहित पोस्ट गरिएको तस्बिरको वास्तविकता पत्ता लगाउन हामीले तथ्यजाँच गरेका छौँ ।
तथ्यजाँच: पुरानो तस्बिर, भ्रामक दाबी
सबैभन्दा पहिला हामीले पुष्पकमल दाहाल प्रचण्ड र मेयर बालेन शाह देखिएको तस्बिरको जाँच गर्यौँ । यसका लागि तस्बिरको स्क्रिनसटलाई गुगल लेन्समा रिभर्स इमेज सर्च गर्यौँ । जाँचको नतिजास्वरुप राइजिङ नेपाल डेली (risingnepaldaily.com) मा प्रकाशित तस्बिरसहितको समाचार फेला पर्यो ।
२०२२ जुन ४ मा प्रकाशित उक्त समाचारमा माओवादी केन्द्रका अध्यक्ष पुष्पकमल दाहाल ‘प्रचण्ड’लाई भेट्न काठमाडौँ महानगरपालिकाका मेयर बालेन शाह खुमलटार पुगेको जानकारी दिइएको छ । त्यस्तै अनलाइन खबर (onlinekhabar.com) मा पनि उस्तै तस्बिर र जानकारीसहितको समाचार फेला पर्यो ।
२०७९ जेठ २१ मा प्रकाशित समाचार अनुसार काठमाडौँ महानगरपालिकाको मेयरका रुपमा निर्वाचित भइसकेपछि बालेनले तत्कालीन प्रधानमन्त्री शेरबहादुर देउवा र एमाले अध्यक्ष केपी शर्मा ओलीलाई भेटिसकेका थिए । त्यसपछि उनले पुष्पकमल दाहाल प्रचण्ड निवास खुमलटार पुगेर उनलाई भेटेका हुन् ।
सोही पुरानो सन्दर्भको तस्बिरलाई दाबीसहित सामाजिक संजालमा पोस्ट गरिएको पाइयो । अर्कोतर्फ मेयर बालेनले प्रचण्डलाई सबैले साथ दिनुपर्ने अपील कुनैपनि माध्यमबाट गरेका छैनन् । उनले कुनैपनि कार्यक्रम वा सामाजिक संजालबाट यस्तो अपील गरेको कुरा कुनैपनि तथ्यहरुबाट प्रमाणित भएन ।
निष्कर्ष
मेयर बालेनले प्रचण्डलाई सबैले साथ दिनुपर्ने अपील गरेका छैनन् । पुष्पकमल दाहाल प्रचण्ड र मेयर बालेन शाहको पुरानो तथा फरक सन्दर्भको तस्बिरलाई भ्रामक दाबीसहित सामाजिक संजालमा फैलाइएको छ ।
नतिजा: भ्रामक
