चितवनपछि काठमाडौँमा रवि लामिछानेको क्रेज भन्दै एउटा भिडियोलाई सामाजिक संजालमा फैलाइएको छ । तर, दाबीसहितको भिडियोलाई रुजू गर्दा रविको क्रेज लेखेर पोस्ट गरिएको भिडियो रवि लामिछानेसँग सम्बन्धित नरहेको तथ्य फेला पर्यो ।
दाबी समीक्षा Kapil_khadka_1 नामक टिकटक आइडीमा पोस्ट गरिएको भिडियोमा कयौँ मानिसहरु सडकमा उत्रिएका छन् । त्यस्तै मानिसहरुले नेपालको राष्ट्रिय झण्डा समाएर उल्लास मनाइरहेको दृश्य देख्न सकिन्छ । साथै भिडियोमा ‘हाम्रो रवि हाम्रो देश प्राणभन्दा प्यारो छ, रवि दाई हाईहाई’को नारासहितको आजाव जोडिएको छ ।
२०२४ अक्टोवर ८ मा पोस्ट गरिएको भिडियोको थमनेलमा लेखिएको छ- ‘चितवनपछि काठमाडौँमा रविको क्रेज । हाम्रो रवि हाम्रो देश प्राणभन्दा प्यारो छ, रवि दाई हाईहाई ।’
के भिडियोमा देखिएको दृश्य राष्ट्रिय स्वतन्त्र पार्टी (रास्वपा)का सभापति रवि लामिछानेसँग सम्बन्धित छ त ? भिडियोको वास्तविकता पत्ता लगाउन हामीले तथ्यजाँच गरेका छौँ ।
तथ्यजाँच: नेसनल डे कन्सर्टको भिडियोमा भ्रामक दाबी
भिडियोको जाँचका क्रममा हामीले Eve Entertainment नामक युट्युब च्यानलमा पोस्ट गरिएको भिडियो फेला पार्यौँ । २०२४ सेप्टेम्बर २० मा पोस्ट गरिएको भिडियोमा ‘National Day Concert Nepal 2024, Nepal Constitution Day 2081ऽ Durbarmarg Kathmandu’ लेखिएको छ ।
फेला परेको भिडियो र काठमाडौँमा रवि लामिछानेको क्रेज भन्दै पोस्ट गरिएको दृश्यमा केही समानता देखिएका छन् ।
संविधान दिवस तथा राष्ट्रिय दिवस २०८१ का अवसरमा काठमाडौँस्थित दरबारर्गमा ‘नेसनल डे कन्सर्ट’ आयोजना गरिएको थियो । २०८१ असोज ३ गते साँझपख आयोजित उक्त कन्सर्टमा राष्ट्रिय भावनासहितको अर्केस्ट्रा, गीत, धुन, नृत्य र रक गीतहरु प्रस्तुत भएका थिए ।
सयौँ युवाहरुले हातमा राष्ट्रिय झण्डा बोकेर फहराउँदै नेसनल डे कन्सर्टमा सहभागी भएको देखिन्थे ।
फेला परेको जानकारीकै आधारमा हामीले ‘नेसनल डे कन्सर्ट’ ‘National Day Concert’ ‘DurbarMarg’ लगायतका वाक्यांशलाई जाँच गर्यौँ ।
जाँचको नतिजास्वरुप Achut Puri लगायतका युट्युब च्यानलमा पोस्ट गरिएका नेसनल डे कन्सर्टसँग सम्बन्धित भिडियोहरु फेला परे । ती भिडियोहरुमा नेपाली युवाहरुले संगीतको लयमा खुसीयाली मनाइरहेकाे देखिन्छ ।
फेला परेका भिडियोहरु र काठमाडौँमा रवि लामिछानेको क्रेज भन्दै पोस्ट गरिएको दृश्य उस्तै देखिएका छन् । यसबाट के प्रष्ट हुन्छ भने नागरिक स्तरबाट आयोजित नेसनल डे कन्सर्टको भिडियोलाई रवि लामिछानेको क्रेजसँग जोडिएको छ ।
त्यस्तै भिडियोमा ‘हाम्रो रवि हाम्रो देश प्राणभन्दा प्यारो छ, रवि दाई हाईहाई’को नारासहितको आजाव पनि सुन्न सकिन्छ ।
उक्त आवाजको जाँचका क्रममा हामीले ‘Rabi Dai Hai Hai’ ‘Song’ लगायतका वाक्यांशहरुलाई युट्युबमा सर्च गर्यौँ । जाँचको नतिजास्वरुप Himal Darpan नामक युट्युब च्यानलमा पोस्ट गरिएको म्युजिक भिडियो फेला पर्यो ।
‘RABI LAMICHHANE SUPPORTER SONG, RABI DAI रबि दाई' लेखेर पोस्ट गरिएको भिडियोमा ‘हाम्रो रवि हाम्रो देश प्राणभन्दा प्यारो छ, रवि दाई हाईहाई’ भन्ने नारा लगाइएको छ ।
फेला परेको म्युजिक भिडियोको नारा र दाबीसहितको भिडियोमा जोडिएको नारा उस्तै सुनिन्छ ।
निष्कर्ष
चितवनपछि काठमाडौँमा रवि लामिछानेको क्रेज भन्दै पोस्ट गरिएको भिडियोले भ्रामक सन्देश प्रवाह गरेको छ । संविधान दिवस तथा राष्ट्रिय दिवस २०८१ का अवसरमा आयोजित नेसनल डे कन्सर्टको दृश्य र रवि लामिछानेसँग सम्बन्धित पुरानो म्युजिक भिडियोको आवाज जोडेर सामाजिक संजालमा भ्रामक दाबी फैलाइएको देखियो ।
नतिजा: भ्रामक
