रवि लामिछाने पक्राउ परेपछि प्रधानमन्त्री केपी शर्मा ओली पोखरा पुगेर देउसी खेलेको दाबी गरिएको भिडियो सामाजिक संजालमा पोस्ट गरिएको छ । तर, दाबी र भिडियोलाई रुजू गर्दा फरक सन्दर्भको पुरानो र असम्बन्धित दृश्यमा प्रधानमन्त्री केपी शर्मा ओली नाम जोडेर पोस्ट गरिएको देखियो ।

दाबी समीक्षा

Bhanu नामक टिकटक आइडीमा पोस्ट गरिएको भिडियोमा पूर्वप्रधानमन्त्री एवं माओवादी केन्द्रका अध्यक्ष पुष्पकमल दाहाल ‘प्रचण्ड’ लगायतका नेताहरु नाचेको दृश्य जोडिएको छ ।

उक्त भिडियोमा प्रकाश सपुत गीत गाइरहेको देखिएको देखिन्छन् तर उनले गाएको गीतलाई मेटाएर तिहारको देउसी गीत जोडिएको छ । 

२०२४ अक्टोबर २९  (आज) मा पोस्ट गरिएको भिडियोमा रवि लामिछाने पक्राउ परेपछि प्रधानमन्त्री केपी शर्मा ओली पोखरा पुगेर देउसी खेलेको दाबी गरिएको छ । प्रस्तुत भिडियोमा लेखिएको छ- ‘रवि लामिछानेलाई पक्राउ गरी पोखरा लगेपछि पोखरामै गएर देउसी खेले केपीले’ ।

के रवि लामिछाने पक्राउ परेपछि प्रधानमन्त्री ओली पोखरा पुगेर देउसी खेल्दै नाचेका हुन् ? भिडियोको वास्तविक सन्दर्भ पत्ता लगाउन हामीले तथ्यजाँच गरेका छौँ ।

तथ्यजाँच: पुरानो भिडियोमा गलत जानकारी जोडियो

२०८१ कात्तिक २ गते नेपाल प्रहरीले पूर्वगृहमन्त्री तथा राष्ट्रिय स्वतन्त्र पार्टी (रास्वपा)का सभापति रवि लामिछानेलाई पक्राउ गरेको छ ।

लामिछानेलाई सहकारी ऐनद्वारा परिभाषित ठगी तथा संगठित अपराध सम्बन्धी मुद्दा अनुसन्धानको लागि प्रहरीले काठमाडौँस्थित रास्वपा पार्टी कार्यालयबाट पक्राउ गरेको हो । कास्की जिल्ला अदालतको अनुमतिमा पक्राउ परेका रवि लामिछानेलाई पोखरा पुर्‍याइएको छ ।

लामिछाने पक्राउ परेको सन्दर्भमा केपी शर्मा ओली पोखरा पुगेर देउसी खेलेको भन्दै एउटा भिडियो सामाजिक संजालमा पोस्ट गरिएको छ । भिडियोको जाँचका क्रममा हामीले ‘प्रकाश सपुत गीत’ ‘प्रचण्ड’ ‘नेता’ ‘नाच’ लगायतका वाक्यांश सर्च गर्‍यौँ । जाँचको नतिजास्वरुप Setopati युट्युब च्यानलमा पोस्ट गरिएको भिडियो फेला पर्‍यो ।

२०२४ मार्च १७ मा पोस्ट गरिएको भिडियोमा तत्कालीन प्रधानमन्त्री पुष्पकमल दाहाल ‘प्रचण्ड’ प्रकाश सपुतको गीतमा छमछमी नाचेको जानकारी दिइएको छ ।

फेला परेको भिडियो र सामाजिक संजालमा फैलाइएको दाबीसहितको भिडियोमा समानता देख्न सकिन्छ । तर, यो भिडियोमा वर्तमान प्रधानमन्त्री केपी शर्मा ओली देखिएका छैनन् ।    

फेला परेको जानकारीका आधारमा हामीले थप जाँच गर्‍यौँ । ‘प्रकाश सपुतको गीतमा प्रचण्ड नाचे’ वाक्यांशलाई जाँच गर्दा गोरखापत्र अनलाइन (gorkhapatraonline.com) लगायतका संचार माध्यममा प्रकाशित समाचार फेला परे ।

२०८० चैत ४ गते प्रकाशित समाचार अनुसार प्रकाश सपुतले गाएको ‘गलबन्दी’ बोलको गीतमा तत्कालीन प्रधानमन्त्री पुष्पकमल दाहाल ‘प्रचण्ड’ लगायतका नेताहरु छमछमी नचेको जानकारी दिइएको छ । 

पोखरा महानगर र गण्डकी प्रदेश सरकारले पोखरालाई पर्यटनको राजधानी घोषणा गर्न आयोजित कार्यक्रममा गायक सपुतले प्रस्तुती दिएका थिए ।

उक्त सांगितीक प्रस्तुतीमा तत्कालीन प्रधानमन्त्री प्रचण्ड, मुख्यमन्त्री सुरेन्द्रराज पाण्डे, निवर्तमान मुख्यमन्त्री खगराज अधिकारी र पोखरा महानगरका प्रमुख धनराज आचार्य लगायतका व्यक्तिहरु स्टेजमै नाचेका थिए ।

सोही कार्यक्रम र नाचको समाचार अनलाइन खबर (onlinekhabar.com), नेपालभ्युज (nepalviews.com),  नेपाल प्रेस (nepalpress.com) मा पनि प्रकाशित भएको भेटियो ।

तर, यो कार्यक्रममा केपी शर्मा ओली उपस्थित भएका थिएनन् ।  फेला परेका तथ्यहरुले के प्रष्ट पारेका छन् भने प्रधानमन्त्री केपी शर्मा ओलीसँग असम्बन्धित भिडियोमा ओली पोखरा पुगेर देउसी खेलेको दाबी गरिएको देखिन्छ ।   

निष्कर्ष

रवि लामिछाने पक्राउ परेपछि प्रधानमन्त्री केपी शर्मा ओली पोखरा पुगेर देउसी खेलेको दाबी गलत छ । दाबीसहितको भिडियो रवि लामिछाने पक्राउ प्रकरण र प्रधानमन्त्री केपी शर्मा ओलीसँग सम्बन्धित छैन । पोखरामा पूर्वप्रधानमन्त्री पुष्पकमल दाहाल ‘प्रचण्ड’ लगायतका नेताहरु नाचेको पुरानो भिडियोलाई गलत जानकारीसँग जोडिएको देखिन्छ ।

नतिजा: गलत