सामाजिक सञ्जालमा एउटा भिडियो भाइरल भइरहेको छ जसमा केही विद्यार्थीहरूले अन्य विद्यार्थीहरूलाई बेल्ट, ब्याट र लाठीले निर्घात कुटपिट गरिरहेको देख्न सकिन्छ । नेपालमा केही प्रयोगकर्ताहरूले उक्त भिडियो नेपालको भएको दाबी गर्दै सेयर गरिरहेका छन् ।
फेसबुकमा “Rohit Rijal” नामक एक प्रयोगकर्ताले भिडियो सेयर गर्दै लेखेका छन्, "नेपालको एक होस्टेलमा यस्तो छ गुण्डागर्जी। सम्बन्धित निकायको ध्यानाकर्षणजाओस्" । मे २२, २०२६ मा पोस्ट गरिएको भिडियोमा हालसम्म
७ लाख ५६ हजार भन्दा बढी भ्युज आइसकेको छ भने ३ हजार ४०० भन्दा बढी पटक सेयर भइसकेको छ । साथै उक्त भिडियोमा २७० भन्दा बढी कमेन्ट समेत गरिएको छ ।
तर के दाबी भिडियो नेपाल कै हो त ? वास्तविकता पत्ता लगाउन हामीले तथ्यजाँच गरेका छाैँ ।
तथ्यजाँच
सबैभन्दा पहिले यस दाबीको सत्यता बुझ्न हामीले भिडियोको स्क्रिनसटहरू प्रयोग गरी रिभर्स इमेज सर्च र सम्बन्धित किवर्डहरू मार्फत खोजी गर्यौ ।
नतिजा स्वरुप भारतीय समाचार संस्था abp मराठीमा प्रकाशित एउटा समाचार फेला पर्यो । उक्त समाचार अनुसार यो भिडियो भारतको महाराष्ट्र राज्यअन्तर्गत कोल्हापुर जिल्लाको हातकणंगले (Hatkanangale) तालुकास्थित 'शामराव पाटिल शिक्षण संस्था' (Shamrao Patil Shikshan Sanstha) को छात्रवास (Hostel) को हो ।
भारतीय सञ्चारमाध्यमहरूमा उल्लेख गरेअनुसार यो कुटपिटको घटना अक्टोबर ६ को आसपास भएको थियो । यस घटनाका भिडियोहरू अक्टोबर १०-११ तिर सामाजिक सञ्जालमा भाइरल भएका थिए । र सोही भिडियोलाई अहिले नेपालको भन्दै भाइरल गराइएको पाइयो ।
उक्त होस्टेलमा केही ठूला विद्यार्थीहरूले साना विद्यार्थीहरूलाई लाठी, बेल्ट र ब्याटले अमानवीय ढङ्गले कुटपिट गरेका थिए । भिडियो भाइरल भएपछि स्थानीय शिक्षा अधिकारीहरू र प्रहरीले अनुसन्धान सुरु गरेका थिए । अनुसन्धानका क्रममा होस्टेलका केही प्रशासक (रेक्टर) हरूले पनि विद्यार्थीहरूलाई कुटपिट गरेको खुलेपछि उनीहरूलाई निलम्बन गरी कारबाही अगाडि बढाइएको थियो ।
निष्कर्ष
सामाजिक सञ्जालमा "नेपालको होस्टेलमा भएको गुण्डागर्दी" भन्दै भाइरल भइरहेको भिडियो पूर्ण रूपमा भ्रामक छ । वास्तवमा यो भिडियो भारतको महाराष्ट्र, कोल्हापुरस्थित एक होस्टेलमा भएको कुटपिटको हो र यसको नेपालसँग कुनै सम्बन्ध छैन ।
[नोट: यस्तै प्रकृतिको दाबी यस अगाडि श्रीलङ्कामा समेत भाइरल भएको थियो । यसलाई श्रीलङ्कास्थित Fact Crescendo ले समेत तथ्यजाँच गरेर भ्रामक भएको निष्कर्ष निकालिसकेको छ । ]
अन्य दाबीका लिङ्क:
https://www.facebook.com/share/v/1CePkmLiDr/
https://www.facebook.com/reel/3103038173418394
https://www.facebook.com/share/p/1E6883V47j/
