दाबी: मेयर बालेन शाहलाई साथ दिँदै उपमेयर सुनिता डंगोललले एमाले परित्याग गरेकी छन् (भिडियो) ।
दाबीमा जोडिएका सामग्री: केही भिडियोहरु, जसमा काठमाडौँ महानगरपालिकाकी उपमेयर सुनिता डंगोल बोलिरहेकाे दृश्य देख्न सकिन्छ । सोही भिडियोको थमनेल तथा क्याप्सनमा उपमेयर डंगोललले एमाले परित्याग गरेको दाबी गरिएको छ ।
दाबी भेटिएको माध्यम/दाबीकर्ता: टिकटक- tiktok.com/@pardeshi049sesson । tiktok.com/@rabi_lamichhane_36 । tiktok.com/@sthakanxa203 लगायतका प्रयोगकर्ता ।
के हो तथ्य: काठमाडौँ महानगरपालिकाकी उपमेयर सुनिता डंगोलले नेकपा (एमाले) परित्याग गरेको दाबी भ्रामक छ । स्थानीय तह निर्वाचन २०७९ मा नेकपा (एमाले)बाट उम्मेदवारी दर्ता गराउँदा सुनिता डंगोलले बोलिरहेको दृश्यलाई सामाजिक संजालमा पोस्ट गर्दै एमाले छाडेको दाबी गरिएको छ ।
नतिजा: भ्रामक
सन्दर्भ जाँच: केपी शर्मा ओली र बालेन शाहबीच उत्पन्न परिस्थिति
केही समयअघि समय नेकपा (एमाले) का अध्यक्ष केपी शर्मा ओली, काठमाडौँ महानगरपालिका मेयर बालेन शाह, सडक विभागबीच असहज परिस्थिति देखा परेको थियो ।
त्यो सन्दर्भमा फैलाइएका भ्रामक दाबीबारे हामीले गरेका तथ्यजाँच पढ्नुहोस्:
- Fact Check: ओली-बालेनको पूरानो तस्बिरमा भ्रामक दाबी
- Fact Check: बालेनलाई केपी ओलीले कारबाहीको चेतावनी दिएका हुन्?
- Fact Check: प्रचण्ड र बालेनको फोटो ‘वर्तमान परिस्थिति’सँग सम्बन्धित छैन
महानगरको गाडीले सडक विभाग र सडक डिभिजन काठमाडौँको गेटमा धुलो थुपारेको र फुटपाथ विस्तारका लागि महानगरले भत्काएको न्युरोडलाई सडक विभागले पिच गरेको सन्दर्भमा मेयर बालेन शाह पूर्व प्रधानमन्त्रीसमेत रहेका केपी शर्मा ओलीमाथि आक्रमक बने ।
सोही क्रमा बालेनले फेसबुकबाटै ओलीमाथि भ्रष्टाचारको आरोप लगाएका थिए । केपी शर्मा ओली र बालेन शाहबीच उत्पन्न असहज परिस्थितिपछि नेकपा (एमाले) बाट काठमाडौँको उपमेयर बनेकी सुनिता डंगोलले पार्टी परित्याग गरेको दाबी सामाजिक संजालमा पोस्ट गरिएको छ ।
तथ्यजाँच: सुनिता डंगोलको पूरानो भिडियोमा भ्रामक दाबी
स्थानीय तह निर्वाचन २०७९ मा सुनिता डंगोलले नेकपा (एमाले) बाट उम्मेदवारी दिएकी हुन् । सुरुमा काठमाडौँ महानगरपालिकाको मेयरका लागि स्वतन्त्र उम्मेदवारी घोषणा गरेकी सुनिता डंगोलले पछि दलीय राजनीतिमा विश्वास गर्ने बताउँदै नेकपा (एमाले)बाट उपमेयरको उम्मेदवारी दिएकी थिइन् ।
निर्वाचनकै बेला २५ अप्रिल २०२२ मा Sunaulo Nepal TV युट्युब च्यानलले पोस्ट गरेको भिडियोमा सुनिता डंगोल बोलिरहेकी छन् । उक्त भिडियोको शिर्षक राखिएको छ- ‘केशव सुनिताले दलबल सहित उमेद्वारी दर्ता गर्दै एक स्वरमा भने: गेम इज ओभर छाप हान्न मात्र पर्खिनु पर्छ’ ।
यही भिडियोको एउटा अंशलाई सामाजिक संजालमा पोस्ट गर्दै सुनिता डंगोललले एमाले छोडेको (परित्याग) गरेको दाबी गरिएको छ । तर, पूरानो भिडियोमा पनि सुनिता डंगोल एमालेको खुलेरै प्रशंसा गरेकी छ । पुरानो भिडियोमा पनि डंगोलले एमाले छाडेको बताएकी छैनन् ।
